#215志仁（女兒，11歲）

當他的志願不是你所想的⋯⋯

你曾經有過怎樣的「我的志願」？我哋嘅年代來來去去都係消防員、醫生、足球員、畫家之類；將來實際會做咗咩職業，真係到時先知。

面對孩子的YouTuber夢

記得五、六年前，同事同我講佢個仔想做YouTuber，呢個夢想只要父母肯幫佢開個Channel，係可以即刻「向夢想進發」。咁開唔開始好？點知幾年後嘅今日，我竟然要面對相同嘅問題：「爸爸，我可唔可以YouTuber呀？」

嗰一刻，我呆咗兩秒；感覺好似déjà vu。

「你已經好忙，又要讀書，又用咗啲時間玩，依家仲要做埋YouTuber？」差啲衝口而出嘅說話，我硬生生吞返入去。因為我知道，一旦講咗，之後嘅對話有可能會變得對立。

我其實好明白小朋友嘅心情。呢個世代，YouTuber唔再只係娛樂，而係一個可以講知識、講興趣、講故事，甚至賺錢嘅平台。對一個有創意、有表達慾望嘅小朋友嚟講，的確係好吸引。

但作為父母，我又點可以唔擔心？

父親的矛盾大對決

我怕佢沉迷流量，怕佢被留言攻擊，怕佢喺鏡頭前太早學識「表演」，而唔再真誠，更怕佢為咗「like」而迷失咗自己。仲未計依家網絡世界嘅種種風險，有啲地方直情要16歲先可以用Social Media。

呢種矛盾，好真實。

一方面，我想保護佢；另一方面，我又唔想成為佢心入面嗰個「阻礙去成就夢想」嘅大人。因為我好清楚當父母變成「反對派」，小朋友就會開始收起心事，甚至連講都唔講。到時，唔止幫唔到佢，連佢發生咩事都唔會知。

所以，我同自己講，要試下換個方式，換個角度。

在保護與放手之間，成為孩子的「第一個觀眾」

嗰日我無即刻拒絕佢，而係問：「咁你諗住拍啲咩內容呀？你個計劃係點㗎？你諗住點樣分配時間？」佢眼仔碌碌，興奮咁話：「你平時都唔睇YouTube，好難同你講喎！」

我明，我細個嗰時都覺得父母好鬼老土，但我唔想行返父母嘅後路，於是我提議同佢一齊試！「咁你教下爸爸囉。我哋一齊訂啲規矩。」例如每個星期拍幾多次，係咪做完功課先可以拍片，幾點之後唔會再對住電子用品等等。真係落實做之前，仲要去了解點樣保護個人資料，應承我留言要一齊睇，唔好自己一個人面對等等、等等。

佢點頭，笑得好開心。

感恩過去我一直花唔少時間喺親子關係上，即將踏入青春期嘅佢，無一下就將我拒於門外。我唔知呢條路會點發展，可能幾個星期後佢就失去興趣，可能佢會愈做愈投入，找到一生志趣。亦可能會面對一啲意想不到嘅挑戰，但我知道，無論結果點，我都要保住「聆聽者」嘅角色。

我覺得做父母最難嘅，唔係開口話「唔得」，而係學識點樣喺矛盾中保持開放；點樣喺擔心入面，仍然畀孩子有空間去試。有咗呢種諗法之後，我自己都放開咗（少少），期待睇佢拍嘅第一段片。

圖片來源：Pexels