研究：明明眼瞓，做乜唔瞓？——小朋友的睡眠迷思

相信大家都一定經歷過，小朋友明明眼瞓，打晒喊路，但偏偏唔願瞓，通常呢啲時候佢哋情緒仲好易波動，隨時一觸即發。父母成日經驗呢種無限輪迴或者會好不解，甚至覺得小朋友係貪玩所以唔瞓，但原來，咁係因為小朋友嘅睡眠機制同能力同大人嘅有小小唔同～

瞓得著要靠「睡眠壓力」

令我哋覺得需要瞓覺啦嘅感覺又叫做「睡眠壓力」，通常「睡眠壓力」愈高，我們就會更容易入睡。而呢種「壓力」係靠住清醒時間去累積腦部一啲物質，所以一個人清醒的時間愈長，「睡眠壓力」就會愈高。

成人一般用14至16小時去累積「睡眠壓力」，但嬰孩的「睡眠壓力」卻比成人積累得更快。年幼的嬰兒通常在醒著一、兩個小時後就會再次有「要瞓覺啦」嘅感覺。隨著孩子年齡的增長，這過程會變慢，需要幾年時間，孩子才能夠整天白晝保持清醒。

睡眠壓力夠大都仲未夠？

不過，咁點解釋有啲小朋友眼瞓都唔瞓？

因為入睡除了「睡眠壓力」要夠大之外，還需要平靜放鬆的心情和環境，偏偏小朋友年紀愈小愈未懂得自我安撫，於是一方面身體很誠實，很想入眠，心情卻無法平靜下來，或者他們身處的地方令他們無法放鬆，例如有噪音、燈光。

所以，一個唔願瞓而耍脾氣的孩子，很可能只是經歷緊身心的拉扯，正需要父母的諒解和協助呢～

或者孩子都想說睡就睡

回想起來，大家或者都有經歷過，孩子玩得太過刺激興奮，通常都會更加難以入眠。如果這時還上演親子角力，往往會令孩子情緒更為激動。想孩子好好安睡，我們需要做的應該是平伏孩子的情緒呢。

其中一個方法當然是擁抱、搖擺、撫摸或輕拍，在他耳邊溫柔的談話、唱歌和哼歌也可以，甚至我們自己先放慢呼吸，已可以讓孩子感受到放鬆的環境和氣氛。

要記得，只要我哋做好情緒安撫，喺「睡眠壓力」之下，孩子想唔瞓都唔得～

圖片來源：Freepik