#216 尚恆

有啲嘢，係會記足一世。

童年發生過嘅好多事情，大部分都好似過眼雲煙，只剩下模糊嘅片段。但幾乎每個人，都總會有一兩件事，會喺腦入面不停重播，提足你一世。

我就好清楚記得，當年讀所謂嘅名校，某位老師望住我呢個成績排尾嘅學生嗰種眼神。佢唔係鬧你、唔係罰你，而係傳遞緊一種更冷嘅訊息：你唔屬於呢度。

老實講，過咗咁多年，我無特別成日記起。但有時咁啱講起，身邊嘅朋友都會好自然咁安慰我：「都過咗咁耐啦」、「唔好諗啦，活在當下啦。」佢哋出發點係好，只不過有啲記憶，唔係你想忘記就可以忘記。

想忘記，大腦卻又總是提醒你

可能有人會覺得係執著，但科學其實有得解釋。大腦並唔係用一個簡單嘅「記住／忘記」掣去處理經歷。睇過篇文章講，長期記憶涉及一連串喺唔同時間啟動嘅分子程序，逐步將某啲經歷鞏固下來。當一段經歷同強烈情緒、自我價值、被否定或被肯定有關，大腦會啟動更多層次嘅記憶加固程序，令呢段記憶變得特別穩定、特別耐。換句話講，唔係你唔肯放低，而係你個腦，將呢件事標記為「重要」，自然就唔會輕易消失。

我記得蔡俊彥喺佢成為世界排名第一嘅劍擊運動員時，講過一句說話，大意係：想對啲曾經睇唔起佢嘅人講一句「我得咗啦！」我估我明白嗰種感覺。唔係想報仇，亦唔係想證明乜嘢，只係想為當年嗰個被否定嘅自己，討返一句遲來嘅公道。

我成長喺一個長期被睇唔起嘅環境入面，久而久之，連自己都開始相信：我可能真係一Pat爛泥，無乜前途。當時我直情覺得老師嘅態度係想我消失，最後，我真係轉校咗。

忘不了才更需要被看見

估唔到喺新學校，我遇到一位真正肯教學生、肯睇見人嘅老師。嗰幾年高中，我搏盡過、努力過，考上大學，仲攞過獎學金。原來我欠嘅，唔係能力，而係有人肯喺我跌到最低嘅時候，相信我，扶我一把。

我心底好清楚，如果無當年嗰啲否定，我未必會轉校；如果無轉校，我亦未必會遇上真正的好老師。或者我應該「感激」過去嘅經歷，但「理解」同「釋懷」，始終係兩回事。

我知道當年睇低我嘅老師，對依家嘅我嚟講完全唔重要。但偏偏，每當我遇到挫折，或者得到一啲成就，佢當年嘅嘴臉，就會不期然喺腦入面浮返出嚟。呢段經歷提醒咗我一樣嘢：並唔係每件事，都可以靠一句「放低」就處理得到。

記得，係因為佢曾經真實咁影響過你點樣睇自己。

童年被否定的傷，讓我更能理解孩子

就係因為咁，當我成為父親之後，我會對一件事特別警覺。當小朋友提起一件已經過咗好耐，但仍然未能釋懷嘅事，我唔會隨口回應：「都過咗咁耐啦」、「好小事啫」、「向前看啦～」呢啲說話聽落似安慰，實際上卻是否定一個人嘅感受。

我會問自己，如果我突然記起嗰段往事，我最希望聽到別人點回應？我好清楚，我無得改變歷史，又唔係要對方道歉。我只係想有人同我講：「係嗰啲老師睇唔到你嘅潛能，仲搞到你對自己無晒信心，但你已經證明咗自己啦。」真係被理解嘅話，一句已經好夠。

所以調換角色，我一定會先接住小朋友嘅感受，而唔係急住教佢放下。
因為我知道，被理解，往往比被勸忘，重要得多。

圖片來源：Pexels