小朋友學習麻麻，父母通常都會喺小朋友身上搵原因。但你有無諗過，學習環境嘅某樣嘢，原來不容忽視！？
呢樣嘢就係「噪音」！《公共科學圖書館：醫學》刊登嘅一篇研究，評估咗交通噪音對2680位7-10歲西班牙學生嘅影響。結果顯示，相比其他學生，暴露於交通環境中時間多3倍嘅學生，一年下來記憶發展慢咗23%，而專注力發展就慢咗5%！
上面提到嘅專注力，係指專注於個別任務的能力；而記憶力，則係特別指「工作記憶」（working memory），即係將某啲資訊記喺心入面，然後運用返出嚟嘅能力。領導研究的Dr. Maria Foraster形容，呢兩種認知發展都對學習非常重要，係解難、推理、數學及語言理解嘅基礎。
咁睇交通噪音對學習影響都幾大，而且連點嘈法都會有唔同嘅影響！研究指出，學校附近嘅峰值噪音（peaks of noise），例如貨車經過路面一聲「轟隆」或者汽車突然加速嘅噪音，比較高的平均噪音水平有更大影響。
咁有機會係因為如果keep住嘈，時間長咗大家都可能聽聽下就慣，自動過濾做背景音，但突然一聲巨響，就會嚇到人個心離一離，即時咩都專注唔到。
不過喺香港地方細細，交通又繁忙，唔少學校都喺正馬路附近，環境嘈雜似乎好難避免。大家又覺得最影響小朋友學習嘅因素係咩呢？
資料來源：
1️⃣Carrington, D. (2022, June 2). Traffic noise slows children’s memory development, study finds. The Guardian.
2️⃣Foraster, M., Esnaola, M., López-Vicente, M., Rivas, I., Álvarez-Pedrerol, M., & Persavento, C. et al. (2022). Exposure to road traffic noise and cognitive development in schoolchildren in Barcelona, Spain: A population-based cohort study. PLOS Medicine, 19(6), e1004001. doi: 10.1371/journal.pmed.1004001