眼淚在心裡流，夾心照顧者的辛酸有誰知？

女兒出生在我的36歲，而爸爸已經70歲了。

呢個世代，唔少人都有相似嘅經歷：三十幾歲先生小朋友，然後因為父母年紀都有返咁上下，要默默咁承擔住雙重責任，一方面要照顧年老嘅父母，另一方面又要撐起下一代嘅未來，成為「夾心照顧者（Sandwich carers）」，只可把時間用在照顧其他人，而無照顧好自己。

仲記得當時女兒出世半年後，爸爸就大病一場，在找不到負擔得起的daycare時，如何在家及醫院遊走了一段長時間，同時要兼顧好爸爸和孝順仔兩個角色，嗰種辛酸同無力感，自己係點捱過嗰段日子？——我其實都唔係好記得。可能因為自我保護機制，令我對呢段日子嘅記憶好模糊。

夾心照顧者的身心健康挑戰

現實中，要承受「夾心照顧者」無力感的人當然不只我一個，甚至不只發生在香港。University College London最近發表咗一項研究，揭露呢群「夾心照顧者」嘅身心健康所面臨嚴峻的挑戰。

研究追蹤咗2009年至2020年間，接近4,000名參與者，當中2,000位係夾心照顧者，另外2,000位則並非夾心照顧者。結果顯示，當一個人成為夾心照顧者，佢嘅心理健康會開始明顯下降，尤其係每週需要花超過20小時照顧家人的人。

當你每日朝九晚五返工，努力喺公司交業績，返到屋企仲要為家人煮飯，陪住一對細路溫書，而家中年邁嘅長老又病倒要人照顧，唔夠時間用所做成嘅壓力，身心自然會感到透支。

更慘嘅係，研究發現，即使喺知道自己身心健康狀況明顯下降時，夾心照顧者仍然無辦法停落嚟。佢哋唔單止需要面對身體疲憊，仲有時會因為感到樣樣都做得唔夠好而自責，好似無論點努力，都未必可以完全滿足三代人嘅需要。

既是照顧者，也是該被照顧的一群

這項研究嘅作者Dr. Baowen Xue呼籲社會需要更重視呢群照顧者：「夾心照顧者係一個特殊嘅群體，佢哋每日面對好多責任同挑戰。社會應該提供更多支持，例如臨時daycare，彈性工作安排，甚至心理輔導，確保佢哋可以喺繁忙中搵返平衡。」

要推動社會多啲資源去幫助夾心照顧者，聽都知唔容易。不過，我哋永遠都可以由身邊嘅一個微小善意或改變開始。首先，照顧者要照顧好自己嘅最minimal嘅需要，唔好瞓都唔夠瞓，唔好逼到自己患上抑鬱症。然後，要識得求助，向身邊信得過嘅人嗌救命，家人朋友有時比你想像中樂意向你伸出援手，當然，到你過渡最艱難嘅時候，不妨也向他人提供協助。如果當刻身邊真係無人能夠騰出空間，咁可能就要降低期望，唔洗樣樣都做到100分，合格剛剛好就夠。

圖片來源：Pexels