#169 父能量（全職爸爸，兒子，5歲）
「我鍾意寫嘢，但更鍾意諗嘢（因為零成本，而且幾時都做得）。最近因為成日喺學問平台上回答問題，被 POPA 編輯撘訕，唔單止刊登咗我好幾篇文章，後來仲話同我做個訪問添。
嘩！人生第一次（亦可能係最後一次）被人訪問喎，當然要隆重其事。於是早喺訪問之前我就已經諗定有咩想講，仲厚面皮到 send 咗條『水蛇春』咁長嘅『重點』俾編輯姐姐。好彩對方身經百戰，無反我白眼，仲好圓滑咁讚我夠『自動波』做準備（在此真心感謝編輯姐姐嘅包容）。
點解會喺『學問』度做分享？
話時話，其實我第一次投稿 POPA 已經係幾年前嘅事，嗰次寫嘅係一件教養迷思。可能係性格關係，好奇心重但又無乜自信嘅我，從小就習慣咗『懷疑人生、不斷求真』。就算面對住一啲再尋常不過，旁人可能不假思索就做咗嘅事，我依然會疑惑自己嘅理解係咪正確，咁做有無問題？
而成為父母後，呢啲疑惑就更多，心諗如果自己都未搞清楚孩子就吸收咗，會唔會從此成為佢哋嘅人生觀？有時真係會好掙扎，我就曾經有一段時間因此而迷失，好似走咗入一道黑暗而無盡嘅隧道，既睇唔到出口嘅光，又唔可以行返轉頭。唔知方向，只可以跌跌撞撞，摸黑前行。
有啲抽象係咪？咁或者等我講白啲。
我曾經係一位會體罰小朋友嘅爸爸。
未為人父時，我一直認為體罰係教養嘅必要元素。但到小朋友出咗世，自己真正成為『施罰者』之後，我先開始懷疑自己呢個『信念』。因為每次出手之後，我都唔覺得自己做啱咗，反而仲內疚萬分，呢種矛盾一直困擾住我，直到嗰一日……
無錯，又到咗故事時間（我實在係幾鍾意講故事）。
畫面一轉，返到阿仔兩歲半嘅時候。嗰日我如常帶佢去公園玩，同佢玩咗一陣之後，我坐低飲啖水，又偷吓懶篤吓手機。突然之間，我聽到阿仔大聲叫罵，我好奇怪，因為成個公園除咗我哋，就無其他人（有啲似恐怖故事）。阿仔當時喺滑梯後面，我企嘅位置睇唔清楚，只係隱約見到佢向住一個無人嘅方向係咁鬧（真係好似恐怖故事）。
但當我走到佢身邊時，我所睇到嘅比恐怖故事更令我不安。原來阿仔鬧緊嘅，係佢嘅玩具車。我聽著阿仔不停鬧：「係咪你錯？你錯呀！打你呀！」然後作勢向玩具車打落去。
呢個畫面，深印腦海，永不磨滅。
然後，我腦中閃過無數情景：有外公打媽媽、有媽媽打我、有我打阿仔、仲有阿仔打佢第時個仔。以前阿爺嗰代，不問情由，唔理你啱定錯，打咗先算。到父母嗰代，問清問楚先打，打完幫你搽返葯膏，算係進步咗。到咗我呢代，諗住講道理，真係走投無路、忍無可忍時先出手，一心以為自己又比上一代好咗。
但係原來阿仔收到嘅，同我所諗嘅，完全係兩回事。
喺嗰一刻，我終於意識到發生緊咩事——我一直以為自己已經脫離咗上一代嘅影響，但事實原來係我一早已被默化而不自知，而且仲已經開始將呢啲『優良傳統』過緊俾下一代——一方面自責難過，但另一方面又有種豁然開朗，因為終於明白一直困擾自己嘅原因，其實就喺自己身上。
『唔可以再咁落去喇⋯⋯』我同自己講，自此立志要痛改前非。
但要改變自己，談何易容呢？尤其一開始時只識得靠自己意志去控制，往往忍唔夠十分鐘就『自爆』。而爆完之後，心情就更差，自愧自責，瘋狂懷疑人生。
諗住去搵書睇，但係行到入書局，望住成個書架嘅育兒書，五花八門，邊本先啱？根本無從入手。加上自己有選擇困難，次次都空手而回。
然後又上網睇好多『育兒秘技』、『親子攻略』。睇住入面嘅教養達人輕鬆教路，諗住照辦煮碗，點知失敗遠比成功多，結果除咗懷疑自己能力，仲懷疑埋自己智力：『到底係咪呃人㗎？』
如是者，過咗好幾個月嘅迷失時期。阿仔入咗我以前間幼稚園，我當年嘅班主任仲成為咗校長。基於對學校有濃厚嘅親切感同歸屬感，我更投入阿仔嘅校園生活，更積極參與學校活動。
後來學校舉辦咗一個『家長正向管教課程』——機會嚟喇飛雲！馬上報名。亦係從呢個課程開始，我接觸到越嚟越多嘅育兒理念，慢慢理解到教養嘅本質，其實就係『身教』。
今日，我唔單止已經『戒打』成功、自信心返咗埋嚟（呢句咁熟嘅？），仲由一名普通嘅全職爸爸，變成一位『6A品格教育』嘅講師（好似好勁咁）。種種轉變，都完全超出咗我本身嘅預期。
但當然，呢啲轉變唔係一夜之間就會發生，而係一個漫長嘅調整過程，有時少啲覺察同克制，好易就會打回原形。而且即使轉變咗亦唔等於從此無憂，新嘅疑惑同掙扎仍然會繼續出現，仍然會有喺隧道摸黑向前嘅時候。不過唔同咗嘅係，喺心入面會多咗個『羅盤』指住一個大方向，有時即使行歪咗幾步，都可以修正過來。
又開始抽象？咁回歸到編輯姐姐最初嘅問題吧：全職父母咁忙，點解你仲會咁熱心去回答其他家長嘅問題？
其實每一次嘅分享，都係我對自己所學知識嘅重溫、對心態行為嘅反思、對教養歷程嘅梳理。定時整理行裝，重新出發。而如果自己嘅文字，哪怕只有一字一句，能夠引起某位同路人嘅共鳴或認同，甚至同行一小段路，已經值得慶賀。
就好似喺隧道入面，忽然聽到有人求救：『睇唔到路呀，到底係咪咁行架？』跟住回應一聲：『係咁行㗎！啱㗎喇！唔使怕喎，其實呢度有好多人，只係太黑睇唔到咋。只要繼續朝住呢個方向行，你會見到出口㗎！一齊行啦！』
加油呀！我係父能量爸爸。」
圖片由受訪者提供