轉眼女兒升小了，意味著我退下職場也有5年了。最近，身邊的媽媽朋友，都在積極考慮重回職場打拼，有部份更早已投入半職的崗位。看見大家揭開新一頁，我也心癢癢，懷念當年踏着高跟上班的日子。
3星期後，在這市道低迷的時期，幸運的我竟獲得一次面談機會。過程很順利，面談到了最後部份，面前這位主管跟我仔細解釋職位的工作範疇。
「我覺得你都幾適合呢個職位，想同你講解一下公司運作同職位嘅日常情況，等你有多點心理準備。」
「公司實行5天工作，辦公時間係早上8點至下午3點半。每日工作日程都比較緊湊。去pantry洗杯、沖咖啡、或者食早餐等私人事務，可以提早在辦公時間前返嚟預備好。總之準時8點開始工作，遲1分鐘人事部都會記低。」
「你嘅職位，主要負責每日同不同部門開會。一日平均7至8節會議，會議一節係40分鐘， 期間要100%專注，手提電話要全程關閉、行開斟水，中途離開會議室嗰啲最好就唔好。放心，我地好體諒同事需要，每兩節會議之間有約10分鐘休息時間，容許大家去洗手間，食點心，飲啖水。」
他連珠炮發後，終於停了下來。
「除咗開會，我仲會被安排其他工作嗎？」我開始覺得主管描述的，跟我原來在求職網上看的有點出入。
「當然有！每個會議後，都會安排後續工作由你負責跟進，確保你每月跟得上業績。你放心啦，好公平嘅，有份開會嘅同事都要一齊做，唔係得你一個。」
「但似乎開完會，已經差不多夠鐘放工？」口直心快的我吐出一句。
「哈哈，一分耕耘一分收穫！工作由你自己決定點安排，有同事會係會議之間嘅小休開始做。工作時間內未完成，我地容許同事帶返屋企做，因為大部份都需要第二日係會議上滙報。」
我聽到最後一句，心都離一離，正想開口表達疑慮之餘，主管繼續他的攻勢。
「我見過部份有效率嘅同事，最早8點就完成，仲趕得切食晚飯。之後我地會安排大家，到網上回顧一下當日會議內容，同為第二日會議作好準備！依家喺香港工作，有邊個唔使加班同帶工作返屋企做，都好平常喇。」主管擠出一個「你懂的」笑容，我也努力回敬一個苦笑，心中暗忖「金翅大鑊鳥」。
「講起食飯，公司Lunch Time係大概幾點？」以前Lunch time，我都喜歡出去感受一下陽光充充電，回來繼續下午工作。
「公司Lunch Time準時12點半，比起其他公司嚟講，時間算好充裕，有足足50分鐘！為提高效率，同事多數會一齊係公司食飯，因為盡快食完飯，剩下時間就當係你嘅自由時間。不過提提你，我地老闆好重視守時，所以50分鐘內一定要返回自己崗位，開始下午會議。」
「係無得揀先一齊喺公司食咋？！行去餐廳、等位、落單、食飯，行返公司……50分鐘都算充裕咩？平均有1個小時Lunch Time好基本吧。」我心想。
不滿我是有的，不過假如份工前途好，便提自己咬緊牙關忍忍吧。
「職位大致上簡介完，你仲有無其他問題？」
「我想問下，呢個職位嘅晉升機會係點？」
「問得好！試用期內，我地會定期評估你對各個部門同公司業務嘅認知。每個部門每兩星期會有一次小評估，每兩個月有一次季度業績評估，一年4次總評估。如果所有評估達標，每年有晉升機會，一般6年後就正式成為部門主管，發展機會非常好！」
「如果無其他問題，最後關於你要求嘅人工方面，有少少補充。因為你嘅職位都係學習為主，而公司已經豁免每年培訓費用，所以未來6年都係無薪培訓期。到正式成為部門主管之後，我地先再同你檢視薪酬待遇。」
「咩話？即係6年試用，但期間都無人工！你呢份咩工嚟㗎，揾鬼做咩！」話音未落，我眼睛一瞪，發現自己躺在床上，一身冷汗。
「X！好彩係發夢。」大概是我太緊張明天的面談，發了這樣一個奇怪的夢。
唉，還是先起來洗洗臉，冷靜一下。
當清水打在臉上那刻，我赫然記起夢裏應徵表上的那個職位名稱 ——「香港小學生」。
*以上故事純屬虛構，如有雷同，實屬悲哀*
圖片來源：Pexels