兩個月前，我前老細畀人炒咗，嚟咗一個新老細。
可能真係新官上任三把火，又或者佢年紀比較大，比較Old School，仲沿用緊一套比較舊嘅管理方式。做事認真本身無問題，但佢特別在意啲細微嘢，例如幾耐覆email、離開個位去咗邊，甚至中途有無停低。呢啲細節，好似比係咪準時交到貨更加重要。
慢慢地，我開始發現，自己連起身去倒杯水、去下廁所、同同事吹兩句水，都會有少少壓力。
我唔係唔賣力做嘢，只係一路做一路諗：點解中間點完成，都要被管？我好清楚自己嘅節奏㗎喎，有時要開turbo，一口氣衝；有時個腦塞塞地，就要停一停，refresh完先再繼續。對我嚟講，呢啲唔係偷懶，而係令自己可以撐到最後嘅方法。
我本身期待新老細唔會計較呢啲，偏偏，上天就派咗個咁嘅人畀我。
我把職場上的吹毛求疵帶回家了
直到有一晚返到屋企，我坐喺飯枱，睇住個女做功課。
佢寫寫下字，停低轉下支鉛筆，又望一望窗外。我幾乎無經思考就開口：「專心啲啦。」過咗一陣，佢郁一郁張櫈，我又補一句：「快啲做完先好玩，唔好郁身郁勢。」
話一出口，我腦海突然閃出一個問題：「句嘢咁熟嘅…？」嗰一下，真係打咗個冷震。
原來嗰一刻，我正正就做緊我最憎嗰種「老細」，下下盯住過程、對停頓零容忍，將「坐定定」當成努力嘅證明。
爸爸的反思
明明我自己好清楚專注從來都唔係一條直線。我自己都無可能一路做唔停，點解會要求阿女做到我自己都未必做到嘅事？
嗰晚之後，我梗係無即刻變成一個好有耐性嘅父母！你估講咁易咩～
但我開始畀自己一個簡單嘅任務——
當我見到佢分心，先問一句：「你係咪有啲攰？要唔要休息一陣先？」
當我想催促，就一齊定個小目標：「做完呢一題，我哋抖兩分鐘啦。」
與其盯住佢坐得定唔定，不如留意佢最後有無完成、有無盡力。
最後，希望大家祝我快啲搵到份新工，告別micro-management的老細；亦都記住，大人可以搵過份新工，細路係無得揀過對父母，又無得揀唔做功課㗎！
圖片來源：Pexels, Ai