社會紛亂間，如何調整心態（父母篇）

各位爸爸媽媽，社會動盪之時，我們都會有過這樣的念頭、感受：

「到底我要點同小朋友解釋呢件事嘅來龍去脈呢？」
「我都想出一分力，但小朋友仲細，遊行都無法去，真係好無奈。」
「睇到啲衝突畫面，唔敢想像如果係自己小朋友咁點算…」
「我對未來無晒信心。」
「我自己都唔係好食得落飯，小朋友好似知道我唔開心咁。」

還有父母會說：

「我唔想喺小朋友面前喊…」
「做野返工都唔係好focus到…」
「返到屋企見到兩個細路，我有啲懷疑自己係咪唔應該帶佢地黎呢個世界」

食唔落飯、瞓得唔好、扎醒；返工、湊仔都focus唔到；
覺得憤怒、恐懼、低落，甚至有無力感都好正常；
又或者好焦急、緊張，好想無時無刻知道最近嘅情況，都係可以理解的，

有以上嘅感受或身體反應，可能係遇上急性壓力反應（Acute Stress Disorder）

即係曾經驗到、目擊、或被迫面對一啲事情，而呢啲事情可能牽涉到實際發生或仲未發生，但能構成死亡或嚴重身體傷害威脅，並引起左一連串反應，包含強烈的害怕恐懼、無助感等等。

如果呢啲感覺同身體反應持續超過一個月，建議大家要尋求專業協助。

雖然我地知道，父母會更加擔心小朋友有呢啲反應，但請別忘了想安撫孩子，我地都必先緩和自己嘅情緒，要先照顧好自己，才能照料他人，那要是我真感到很困擾，影響到日常工作或家務，咁可以點做？

雖然我地話父母要先平伏自己情緒，但都唔需要畀太大壓力自己。因為就好似一塊石頭丟進水中，泛起嘅漣漪唔係一下子下以停下來，而且每個人嘅反應都唔同，有強有弱有長有短，仲未能平伏嘅，不妨同自己講句It’s OKAY, and it’s okay to be NOT OKAY.

如果感覺到自己情緒仍是比較波動，不妨先將孩子交畀隊友，或者輪流去照顧小朋友，同另一半互相補位，一方面有多啲空間靜下來，同時可以減低孩子受父母情緒影響嘅機會。

如果真係忍唔住喺子女面前，表現得較為激動，無論係傷心痛哭，定憤怒，都可以喺之後同佢地分享返你咁激動嘅原因，亦可以畀佢知道情緒表達係OKAY嘅。

喺身心承受重大壓力嘅情況下，有人可以互相支持、傾訴係非常重要嘅支援。
特別係喺屋企之中，家人之間能互相體諒同支持，猶其珍貴。

當然，屋企唔一定個個人都持相同意見，但屋企並唔係辯論場地，我地無必要拗贏邊個。若果大家真係各持己見，呢一刻未能平心靜氣，可以先搵個能夠同理同支持到你心靈嘅朋友，或者專業人士傾訴，疏導情緒。

社會事件通常事態發展非常急速，想知道最新消息可以話係人之常情，但頭腦過熱會造成好大嘅身心負荷。

大家不妨劃定一啲時間必需放下手機，或者調到勿擾模式，又或者關掉數據功能一段時間，等腦袋可以停一停。

依家網絡發達，資訊流通得快，大家都可以掌握第一手資訊，但同時都助長一啲未經證實嘅消息瘋傳，而呢啲消息通常都好吸睛，而且能牽動大家情緒。

收到一啲新消息嘅時候，我地不妨停一停，先睇下有無一啲有公信力嘅媒體有同樣嘅報導，以免為左一啲假消息而動氣或傷心～

如果一時三刻心情難以平伏，不過換個方法，又作息同飲食入手，調整好身體～每個人都有唔同嘅減壓方式，沖個熱水涼、早晚找幾分鐘，專注呼吸做冥想／靜觀嘅練習、吃自己喜歡嘅食物、不想做運動，拉拉筋都可以～等自己嘅身體可以放鬆，從而改變心情。