當孩子還小，你可能會想：佢咁細邊識揀吖？梗係事無大小都父母話事！到佢大個咗識得揀，咪畀佢自己選擇囉！
但係原來細個無得揀，有機會影響到孩子發展出自己的喜好，大個咗都未必識得揀。同大家分享美國 Johns Hopkins University 有份參與的一個新研究發現。
讓 BB 揀積木
研究分了三個處境：
在第一個處境，研究員在實驗室中分開放置了兩個積木玩具，參與研究嘅 BB 可以自由咁爬去玩其中一邊嘅積木。當 BB 作出咗選擇，研究員就會將這個積木拿走，換一個新的，然後讓 BB 重新一次作選擇。最後大約7成半的BB會選擇新積木，而不是本身那個「無被選中過的積木」。
在第二個處境，雖然實驗室仍然有兩個積木，但 BB 一開始無得揀，研究員會控制佢玩哪一個積木。之後佢地同樣會拿走 BB 在玩的積木，放回一個新積木，呢個時候 BB 終於可以作出選擇。而佢地選擇新積木或舊有沒玩過的積木機率差不多。換言之，對比第一個處境，BB 無偏好新積木。
而在第三個處境，一開始兩個積木放咗入兩個一模一樣嘅箱入面，BB 知道箱中有玩具，但就唔知邊塊打邊塊，亦唔知自己隨手揀嗰個係乜；到第二次有機會睇住積木選擇，亦不會受第一次玩過嘅積木影響到，即係無發展出偏好。
這三個處境分別用咗兩組 BB 反覆進行，最後結果一致。
從選擇種出偏好：Choice shapes preferences
雖然研究過程有啲複雜，但研究團隊作出結論係「Choice shapes preferences」——亦即 BB 會因應自己的選擇，發展出自己的喜好；沒有經過選擇呢個過程，就未必會發展出特定的喜好。
當然，這個研究結果只是一個初步的發現，小孩怎樣發展自己的喜好亦不可能只基於單一因素。但若我們希望孩子長大後能夠更懂得自己的喜好，過讓自己喜悅快樂的人生，不要小看由細到大給他們從選擇中發展出喜好的機會。
資料來源
Johns Hopkins University. (2020, October 2). Babies’ random choices become their preferences. ScienceDaily. Retrieved October 19, 2020
圖片來源：Pexels