親職壓力同華人文化有關？一齊建立自閉症友善的社會文化

平時我哋成日分享研究，等大家了解小朋友多一點，其實我哋同樣關心家長們身心健康，畢竟湊細路一啲都唔容易～如果家有自閉兒，親職更加唔簡單，佢哋面對挑戰亦更少人提及。

詹姆斯庫克大學新加坡國際校區 2015 年嘅一個研究發現，相比一般孩童的家長，自閉兒的父母有更多親職壓力和抑鬱症狀，而且他們較常用無助於適應的應對方式（maladaptive coping strategy）去回應眼前嘅挑戰，例如抽離或逃避。

你或者會話，條路自己揀……但參與這次研究的 136 名家長中，有超過八成都是華人，研究員比對過去其他西方國家的研究，指出華人社會的文化才有機會是「幕後黑手」。新加坡和香港的學習氣氛相近，都一樣推崇學術成績，父母若看到孩子追不上，自不然會擔心；華人社會亦有所謂「家醜不出外傳」，當社會對自閉症普遍有負面的理解，家長有機會出於害怕社會污名化而不去求助。

然而，採取這些應對，父母亦是心裡苦自己知。有研究指當父母抽離或逃避，他們會傾向責備自己，負面情緒反而與日俱增，更會令他們放棄解決眼前的問題。

寫都寫到灰灰哋，但如果可以從硬幣的另一面看，呢個研究正正話畀我哋知，學界一直都沒有忘記含辛茹苦的照顧者們。而且並非完全無出路，過去有其他研究指出，父母是否能接受孩子需面對社交溝通等挑戰，對他們自己的身心狀況有關鍵作用；孩子的自閉症狀、學習能力高低以及學校怎安排，同樣可以影響家長的壓力。

其實，就連我哋一般人嘅角色都超級重要！因為社會都係由人組成，我哋願意接納，多啲支持，反過來就可以改變社會文化！就好似我哋喺之前嘅短片講過，其實喺香港都有唔少機構推動緊公眾教育同埋家庭支援，好似賽馬會喜伴同行計劃，早係 2015 年開始，通過非政府機構轄下 18 間地區中心或家長資源中心，為超過 25,000 位自閉兒童的家長提供培訓課程和支援服務，更引入世界衞生組織親子技巧訓練課程，以實證支持（evidence-informed practices）的方式來照顧這些家長的需要。

說到底，無論有沒有特殊需要，每位孩子都是獨特的，我們要做好親職亦一樣不容易，大家都是同路人～

若你問你壓力誰在乎過，我哋都在乎架！