EQ即情緒商數Emotional Intelligence Quotient，好多家長都希望小朋友EQ高啲、將來人緣好啲、做事積極啲。而為令孩子學識調節情緒，千方百計絞盡腦汁，不過覺察情緒呢家嘢，咪話小朋友，大人都覺得難。咁大人點樣幫到小朋友？原來，父母「玩得」就得！
EQ調查
以色列Ruppin Academic Center曾對137位育有年齡為2至8歲小朋友的家長進行問卷調查，結果發現「玩得」的家長可以幫助到小朋友提高調整情緒的能力。
但係咩叫「玩得」先？研究原文係 “playfulness”，即係表現歡樂及富有幽默感！而且唔止於同小朋友玩遊戲嗰陣，而係喺親子日常相處中無論處事或者交流，都表現得好有靈活同有創意，令小朋友都覺得有趣。
留意返，取笑戲弄小朋友嗰種「玩」並唔包括在內～
聽落好似好虛，其實背後原理好簡單。「玩得」的家長之所以幫到小朋友，就係因為佢地靈活有彈性，能夠將嚴苛的情況變得輕鬆，找到各種替代的應對策略，並且喺充滿壓力及衝突的情況下，仍然表現得幽默，進而緩解小朋友的各種情緒。
又因為「玩得」反映出家長本身的情緒調節能力都比較好，而家長作為小朋友的榜樣，就可以達到「身教」。小朋友亦會通過觀察家長，去模仿情緒表達，再加上「玩得」的家長的教養方式傾向溫和及不霸道，可令親子間衝突減少。
Fun Parenting
不過要注意嘅係，凡事都要適可而止，因為太過「玩得」都有機會令親子間嘅界線模糊，所以都要喺當中搵到個平衡！
如果想小朋友調節情緒更好，以後各位爸爸媽媽記得平時都要fun一啲啦！
研究裡面媽媽多過爸爸，睇嚟媽媽好玩得，唔知玩得嘅爸爸係咪一樣效果呢！？
圖片來源：by Xavier Mouton Photographie on Unsplash
參考資料
Shorer, Swissa, O., Levavi, P., & Swissa, A. (2021). Parental playfulness and children’s emotional regulation: the mediating role of parents’ emotional regulation and the parent-child relationship. Early Child Development and Care, 191(2), 210–220.