錯失恐懼症惹的禍？13.6%波蘭父母表示後悔生育

「執輸行頭慘過敗家」——驚蝕底呢件事無分國界，外國就有一個專有名詞「FOMO」去形容呢種心態：Fear of Missing Out。有人因為FOMO而高追入市，有人因為FOMO而密密睇手機，怕錯失任何一則資訊。但原來有一群人，正因為呢種害怕被邊緣化的焦慮而成為了父母。

錯失恐懼症導致錯下決定

美國最近有研究發現，大概有 7% 嘅父母表示，如果可以重新選擇，佢哋寧願唔生小朋友。數字喺歐洲仲高，德國有 8%，波蘭更加有接近 13.6% 嘅父母覺得後悔。研究人員進一步審視了這些父母當初是如何作出生育決策，最後發現了其中一個主要因素竟然就係FOMO？！

即係話，有好些父母因為「怕錯過」，就「趕住」踏入父母呢個角色。

研究指出，大家各有不同嘅「怕錯過」——怕自己無機會經歷「湊仔」呢個人生階段；怕同輩個個都有仔女，自己落於人後。呢啲焦慮同比較，推動住佢哋倉促做決定，最終帶嚟嘅唔係幸福嘅家庭，而係處於後悔之中。

做人父母並不是活在一堆粉紅色泡泡

生過小朋友就會明白，成為父母會對生活帶嚟翻天覆地嘅變化，再加上日常壓力、經濟負擔、伴侶關係嘅變化，何止「失自由」，隨時自我都無埋。當然，當中都有好多只有父母才能感受嘅幸福和滿足，但如果只係出於FOMO而成為父母，相信會更難接受新角色加諸喺我哋身上嘅甘甜與苦澀。

相信今日睇到呢個Post嘅大家，無論出於什麼原因，都已經成為父母，諗返轉頭都未必有意思。只係呢個研究都提醒我哋，順著FOMO去做人生嘅決定往往帶嚟一啲意想不到嘅後果。期望我哋喺教養當中都唔好再畀FOMO牽著鼻子走，而可以更加堅定咁遵從自己內心嘅想法啊！共勉。

圖片來源：Pexels