小朋友天馬行空嘅諗法，有時真係會嚇你一跳。好多時我哋好想孩子有創意，不過若果一啲稀奇諗法無乜實際用途，大家未必會認真對待或者正面回應，就好似聞西發明嘅太陽能電筒咁，幾有諗頭都係得啖笑。
咁到底所謂「創意」係啲乜？係咪新奇好玩就得？定需要有埋實際用途，先能夠稱得上係創造力爆棚？
原來有唔少學者都有討論何謂創意，「有用」更加係其中一個重要元素，不過專注於研究「遊戲（Play）對孩子成長的影響」嘅心理學教授Dr. Sandra Russ就認為，創意係指「構思原創想法的能力」，將意念、圖像及經驗以新方式結合，而對小朋友嚟講，「用處」並非創意嘅條件，又或者玩樂本身對個人嘅價值，就已經係最大嘅「用處」。
點解咁講？因為喺遊戲當中，小朋友可以天馬行空，可以用自創嘅方式去玩，甚至唔一定要make sense，亦都冇絕對嘅對錯，最重要反而係佢哋可以盡情跳出框框，自由自主咁探索，並表達內心世界，呢種無絕對答案嘅空間對小朋友認知同情感嘅發展都好重要。
「發問」其實都一樣！小朋友對世界充滿好奇，好多時佢哋嘅提問都一樣天馬行空，甚至可以話係極度無厘頭：「點解你要住十樓？」、「點解人要食嘢？」、「點解廁所無腳？」呢啲問題令我哋頭都大埋，有時調返轉到我哋問問題，佢哋嘅回答亦可以完全脫線，「你大個想做咩？」：「我要做怪物畫家！」、「我要做滑版收藏家~」、「我想做朱古力跳水世界冠軍！」
不過，無論係問定答，最重要嘅係，我哋作為大人，有無尊重小朋友對世界嘅呢份好奇，有無畀到空間孩子去自由提問或者發掘答案，並且去接受根本冇一個所謂嘅model answer，天馬行空嘅問題可以有天馬行空嘅回答，所有事情都係一個「問號」，好多時創意就係由一個「問號」開始，等孩子自己去發掘，自己去定義。
就等我哋拋開大人嘅框框，還返創意嘅空間畀小朋友啦～
參考資料
- Singha, S., Warr, M., Mishra, P., Henriksen, D., & Deep-Play Research Group (2020). Playing with Creativity Across the Lifespan: a Conversation with Dr. Sandra Russ. TechTrends : for leaders in education & training, 64(4), 550–554.
- 海狗房東（譯）（2020）。《沒有為什麼：親子溝通翻譯手冊 破解爸媽的外星話》（原作者：Davide Cali）。台灣：國語日報。（原作出版年：1989）
圖片來源：Pexels