生仔要考牌吖嘛，相信大家一定聽過。只要你喺大庭廣眾下教養孩子，總有人會多多意見，你個「父母牌」隨時都可以被街邊的張三李四吊銷，好似佢哋可以用幾分鐘嘅觀察，斷定你呢個廿四小時無休嘅父母嘅水準。
研究：家長讓孩子獨立的顧慮
美國密西根大學健康中心C.S.莫特兒童醫院一項全新全國兒童健康民意調查顯示，雖然大多數家長都認為孩子可以從獨立的機會中受益，但不少家長對於讓小孩獨自處理事情有不同顧慮。
有一半家長認為孩子在無大人監督的情況下會製造麻煩，有四分之一的家長曾對其他家長的育兒方式作出批判，超過一成家長指責過其他家長沒有好好管教子女，亦有超過一成家長很怕被指無管好子女而妥協，不敢放手讓孩子獨立處理事情。
「生仔要考牌」令家長教養現制肘
有份參與該項調查的公共衛生碩士生Sarah Clark指出，不少父母受到「指責文化」的影響，對如何處理子女問題步步為營。他們最大的顧慮就是如果孩子發生甚麼不好的事，他們就會受到批評。
阿E其實都好怕畀人話生仔無考牌。
就好似有人話好怕搭飛機遇上同艙有小朋友鬧情緒，其實佢哋唔知，做父母可能仲驚，未出發先淆底，求神拜佛想佢安安靜靜。有時小朋友喺街度喊，即使我知道佢只係需要時間冷靜，我幾有耐性，都怕佢嘈到人。
我自己做人父母嘅經驗係，呢啲moments通常係突發，真係唔係每次都可以預測到，亦未必好快就搵到最適合嘅方法去處理。要做到無人再叫你考牌，其實係一個漫長嘅經歷。就好似作為新牌仔，有幾多個無畀人「呠」過？路面經驗係要時間同實踐儲返嚟㗎。
別忘記孩子的真正需要
仲有好多世紀辯題，例如幾歲可以畀小朋友自行放學？同樣係小四，有人覺得太細，話你罔顧小朋友安全，亦有人覺得啱時候學獨立；15歲拍拖呢？太早熟？容許的話畀人話你太開放，唔畀又話你太保守…
如果因為怕咗「生仔要考牌」嘅批評而唔敢放手，或只求用大眾接受嘅方式去教，好容易令我哋忘記孩子的真正所需。
其實，教仔失手或失敗係讓我們成為稱職父母的過程，而且教養並無標準答案，所以唔好怕，做錯咪改囉，一於好好學習及享受育兒，總之一齊喺呢個過程共勉之啦！
圖片來源：Pexels