#129 Owen媽媽 （大女26歲，二仔22歲，細仔5歲）

「如果每個父母嘅育兒經歷都可以寫成一本書，我嗰本，應該會分成兩章，上章由17歲生下第一胎開始，下章就寫自己37歲做高齡產婦。兩章記載的風景截然不同。

37歲做高齡產婦

咁嘅年紀先有咗第三胎，最初成家人都好驚訝，當時已經20歲嘅阿女直接問我點解咁突然：『你唔係有避孕架咩？』，而17歳既阿仔反應係：『呀！BB會唔會覺得家姐阿哥好老呢？』就連幫我檢查嘅醫生，都毫無掩飾佢嘅驚奇。

『你懷孕紀錄已經係17年前架喇喎……』
『係呀……』
『計劃架？』
『唔係……』
『用避孕套？』
『係……』
『同唔同一個老公……？』
『緊係同啦！』

我知好多人都奇怪，仔女咁大先嚟生第三個？大家有所不知，其實就係仔女已經大個，都唔洗我同老公理。呢個時候，我地兩公婆走出婚姻停滯期，多咗時間拍拖，又親密多咗，於是……換個角度睇，雖然佢係個意外，但名副其實係個愛情結晶，一個甜蜜嘅負擔！

跟孩子一起長大

知道有咗之後，我毫不猶疑，立即辭職，決心要做個全職媽媽。
唔好以為我好有經驗，其實今次先係我真正親職教養。

當年生完大女，我都只係得17歲，同學都未畢業，我同老公都要為家庭經濟著想，所以一齊出去工作，個女（同埋之後生嘅二仔）就順理成章交俾同住既老爺奶奶湊，無太多掙扎。始終上一代環境唔同，湊小朋友好似『看狗仔』咁，搞掂吃喝拉睡就得。

不過好多時我都會遇到教養上既難題，加上三代溝通分歧，例如一對仔女成績唔好，會諗係咪我同老公年紀太輕唔識教，覺得好無助！無論年齡定心智上，都覺得我地真正係同仔女『一齊長大』呢。

一樣的媽媽，不一樣的教養方式

來到兩個年代後嘅今天，我更清楚育兒要好多學問，有好多嘢真係要從頭學過，好似以前教落係用消毒火酒幫BB清潔肚臍，點知原來而家係話用清水；以前大家餵奶粉多，而家就話母乳好。你話，唔花時間好好學下點得丫？係就係攰啲辛苦啲，但我相信，自己一手一腳湊的話，除左做好身教，培養小朋友有良好價值觀，親子之間溝通同感情都有好正面嘅影響。

而家嘅我，會帶住細仔單獨兩個周圍去旅行放眼世界！朋友問：「一個人帶住個幾歲細路去美國坐長途飛機咁辛苦？」話唔辛苦就假嘅！但係呢個專屬我同仔仔建立嘅甜蜜關係，就喺呢度緊密連結咗，一世難忘！幾勞累都好值得！與其花費去playgroup，我會留啲資源去旅行，起碼自己都有得享用下呢！

大女同大仔雖然而家已長大成人，但有時都會呷醋：「細佬資源最充足，有家姐阿哥，最重要係阿媽自己湊。」口係咁講，其實最錫細佬嘅就係佢哋。家姐呢，因為細佬同佢小時候一樣樣，有獨特嘅連繫，錫到個細佬燶！阿哥就童心未泯，會好似大細路咁陪細佬玩，而爸爸就當然孻仔拉心肝啦！

可能因為喺呢個環境長大，細細佬都早熟啲。有一日佢突然問我：『點解我無兄弟姊妹既？』『咩無呀？你咪有家姐哥哥囉！』『唔係呀，我講小朋友嗰啲丫……』『哦，因為我同爸爸好耐之後先生你囉。』自此，佢就成日走嚟摸我個肚，叫我生返個細佬妹俾佢添。

唔好喇掛？？
一個剛結婚有喜的大女，一個剛踏足社會的大仔，一個讀緊幼稚園嘅細仔。有三個仔女，我同老公堅定夠晒數。」

圖片由受訪者提供