我個囡今年三歲，係其他人眼中，佢係一個成日笑、對任何人都十分熱情嘅開心果。雖然我從來都無灌輸「流血不流淚」嘅諗法俾佢，但就唔知點解，佢對表達唔開心嘅情緒，係有啲困難。
上星期同亞囡去診所打流感針，一如以往，非常hyper咁同四圍嘅人打招呼。說時遲、那時快，醫生手起針落，亞囡嗰下呆一呆，一秒過後又繼續興高采烈玩佢手中嘅玩具。
醫生見佢打針冇喊，係咁讚佢，仲破例送兩張貼紙俾佢；診所姑娘見佢打針冇喊，就送另一張大貼紙同佢至愛嘅米妮公仔卡俾佢；屋企樓下個「食Q姨姨」見佢打針冇喊，送咗一包薯片俾佢。唯獨係佢亞媽，見佢打針冇喊，有少少擔心……
亞媽：亞囡，頭先打針痛唔痛呀？
亞囡：唔痛呀！（明顯口不對心…）
亞媽：如果覺得痛可以話俾媽咪知，可以喊㗎！
亞囡：……（低下頭、冇出聲）
過咗一陣，佢望望自己張膠布，突然悲從中來咁話：媽咪，我呢度打針針貼咗張膠布呀，然後……忽然……喊得聲嘶力竭，一喊就喊咗半個鐘……
我唔知道點解亞囡啲眼淚會delay，但我竭力將嗰句：「唔好喊啦」往肚裏吞，然後緊緊抱住佢，只係簡單地希望俾個空間佢好好抒發內心嘅感受，就好似大人返工唔開心，向朋友傾訴苦水一樣。