話說一晚有隻螳螂飛咗入屋，當年只得5歲嘅阿仔唔知呢隻係乜，所以有啲慌張。跟住我捉咗隻螳螂放咗入個透明膠盒度，然後同阿仔一齊睇下，諗住畀佢認識多啲生物，咁就唔會大驚小怪。點知佢睇咗陣話想養隻螳螂做寵物。
當阿仔的要求令我不知所措
我開始頭痕，一方面我諗：「隻螳螂仲好細，都唔知畀咩佢食好，陣間餓死咗佢你仲傷心，不如放咗佢算啦。」
如果拒絕阿仔呢？又真係要認真諗諗點樣講，先可以唔令佢傷心，更加唔想令佢覺得我哋好強硬咁否定佢，咩都唔畀佢做咁。
另一方面我又諗起其中一堂正向教養課，主題係〈讓孩子起飛〉——「儘量畀孩子去嘗試佢哋想去嘗試嘅嘢，你永遠唔知佢哋可以帶你去到咩地方。」
阿爸都有進退失據時
究竟我應唔應該拒絕佢呢？
於是果晚我就真係走去搵下資料點養螳螂，到最後仍然發覺係好難。因為要搵嘢畀佢食，除非走去買啲蟲仔返嚟。但老婆好怕呢啲嘢，一見到蟲就毛管戙，一諗要夾條「生勾勾」嘅蟲畀隻螳螂獵食，連我自己都有啲抗拒。
於是，第二日我就照直同仔講「我哋唔養啦」，佢當然好失望。望住阿仔耷低頭，粒聲唔出就行開咗，令我都唔好受。不過，我都無迫佢要馬上放生，想等佢準備好先講再見。之後佢全日都不斷提起隻螳螂，又不停問佢係咪死咗。所有提問我都如實咁相告，然後每次阿仔都會進入返果個失望嘅心理狀態。
嗰晚阿仔同太太入咗房瞓覺時，我聽到阿仔喺度飲泣。於是呢一刻，我好疑惑自己係咪應該同佢一齊嘗試下養佢。不過，當下我仍然唔知應該點處理，亦唔知點去開導阿仔。
孩子也會自然想通
點知第三日，阿仔一早起身，就走咗去拎起個膠盒出去露台，打開個蓋放走咗隻螳螂。我好驚訝：「吓？你放咗佢？你唔係好想養佢㗎咩？」
佢好平靜咁話：「係呀，但係我哋搵唔到嘢畀佢食，我唔想佢死咗。」
嗰下我呆咗，無諗過5歲大嘅佢都會突然諗通咗。
然後我再諗咗一段時間（我真係好鍾意諗嘢）。
好多時孩子遇到問題，我哋父母都好想搵個方法去幫佢哋，而過程中我哋都會有疑惑：「到底我咁處理嘅話係咪好事？用第二個方法又會唔會好啲？」我哋都會怕自己做錯咗選擇，然後令孩子受傷，又或失去某啲機會去成長。
但係只要我哋以平常心，將事情如實相告，而唔係強硬咁否定佢，孩子其實會自己去學習思考同面對。當然，過程或者會傷心，但只要我哋畀足夠時間同空間，唔好落井下石，佢哋會自己爬返起身。
我學會放手，他學會取捨
好比阿仔佢今次的確好似少咗個機會去學習養昆蟲，但係佢另一方面亦認識到「取捨」，經過思考後，最後選擇放走咗螳螂。
小事一樁，但只要我哋肯去諗一諗，我哋都可以意識到，原來孩子本身都一直喺度成長緊。有時候，係唔需要我哋干預咁多，或者幫佢哋做決定。佢哋需要嘅，其實只係父母給予時間、空間、陪伴同信任。
圖片來源：Pexels, Unsplash