各位父母：
大家好！我個名叫做Error，中文名叫做「錯誤」。我好想喺度同大家分享我一啲心事……
唔知你哋仲記唔記得，你哋細細個嘅時候全部都好歡迎我架。就算好多時啲大人想幫你哋擋開我，完全唔俾我埋身，你地都會一次又一次再努力嘗試，成日返到來我身邊。我哋曾經係好好嘅朋友嚟架！
例如你哋細個學行嘅時候，就成日會遇到我。你哋會跌低、會痛，咁並唔係因為我心地唔好，其實我想你自己發現，跌原來係會痛，令到你哋會努力不懈再嘗試，搵個避免再跌痛嘅方法，所以全靠我，你哋先可以學識行得穩咋。
Error說：愈唔想見到我，就愈容易見到我。
不過而家啲人，成日都阻止我嘅出現。有啲大人每次見到小朋友一跌就會拉返住佢，甚至搵條繩拉實BB，等佢完全唔好跌。小朋友因為從未跌過一跤、唔知痛，去到樓梯都經常橫衝直撞亂咁嚟，我見到覺得又危險又擔心。如果，個小朋友一早認識咗我，佢就會學懂安全意識。
我都明白，啲人係怕小朋友受傷。但其實我做過統計，你哋細個時，係唔會犯同 一個錯誤多過3次。例如小朋友成日鐘意爬入枱底，有好多大人會拉開張枱，一係用手幫佢擋住。但原來，小朋友第一次無為意頭頂有嘢；第二次可能仲未記得，但到第三次就會壓低個身先行動，好醒架！小朋友經常有好多千變萬化的方法去接招，去解開我俾佢哋嘅難題！
但當你哋慢慢長大後，唔知點解都一樣變得愈來愈疏遠我，甚至好驚我。我真係好傷心！有人見到我會掉頭走當睇我唔到；都有人千方百計咁避開我；亦有人一遇到我會變得心情低落。
點解會咁呢？會唔會係因為每當我出現，身邊的人都會不斷指責你，話你差呢？ 你每次見到我，都會覺得自己好無用？其實，愈唔想見到我，就愈容易見到我……
我好想提醒啲大人，如果小朋友犯錯，千祈唔好指責佢，亦都唔需要幫佢承擔後果。小朋友只需要你哋嘅接納、支持同陪伴，然後佢就會更有力量面對我、糾正我，同埋繼續嘗試下去！
我懇請大家記得，我嘅出現唔係為咗話你知，你有幾唔好。我嘅初心正正相反，亦從來無變——我一直都係想你哋藉著遇見我，好好擁抱我，好好聆聽我嘅提醒，思考下次點樣可以做得好啲，咁先唔會再喺同一個地方遇到我。最後，你會變得更好，成長得更多。
Error敬上
圖片來源：unsplash