Theory of Mind：孩子角度看世界，點止踎低咁簡單！

心理學家教落，同小孩溝通最好可以踎低同佢眼睛同一個level，有助我哋投入孩子角度。不過，事實上要身同感受，真係咁簡單？

舉個例子：

每次我 work from home，同阿女講「爸爸陣間要開會，唔好嘈，唔係我會畀老細鬧㗎。」就嚟5歲嘅女兒看似明白，但幾分鐘後佢都係會嘈到拆天。

我哋可能好快就會用「自制能力不足」去總結成件事，但係咪真係可以完全歸咎於孩子的自制能力呢？

除咗自制力，仲有一種能力發展中㗎咋

事實上，開會時個背景嘈到拆天，老細會有幾嬲、老細鬧完後老豆會有幾頹等等，需要有「站在別人角度」的能力才能理解，而這能力並不是與生俱來的。

佢仲有個科學啲嘅學名，叫「Theory of Mind」，係喺孩子4-7歲之間才逐漸發展出來。

考考你：朱古力在哪兒？

故事是咁的：家姐返學前將盒朱古力放咗入雪櫃，諗住放學有得食，點知細佬喺姐姐返緊學嗰陣，拎咗出嚟食，食完就喺放咗喺睡房。到家姐放學返到屋企，你估下佢第一時間會去邊度搵盒朱古力嚟食？

梗係去雪櫃啦！——因為返咗學嘅家姐，唔會知道細佬拎咗嚟食嘛。

但你知道嗎？4歲的孩子多數會答：睡房。

因為4歲嘅小朋友，大多未發展出「站在別人角度」的能力，所以只會照字面去理解故事，而唔會從家姐角度出發，亦理解唔到家姐點解唔知朱古力已經放咗喺睡房。

到底是誰在蠻不講理？

有啲難明？的確係需要用啲時間。

就好似我哋覺得明明係好自然就能明白嘅事，對小朋友而言並唔係理所當然一樣。如果我哋唔知小朋友原來根本未完全發展出理理解別人角度的能力，就會覺得佢哋不理別人感受，不可理喻，但查實大人先係有能力嗰個，唔從小孩嘅角度出發，恐怕才是真正的蠻不講理。

Theory of Mind有咩咁重要？

講到底，要理解孩子唔止要踎低，仲要理解佢哋唔同嘅發展里呈碑。

Theory of Mind仲可以話係孩子慢慢發展做人處世態度的能力，例如「同理心」都同佢息息相關。唔知大家又想唔想知點樣可以幫孩子發展Theory of Mind呢？不妨留言話我哋知吖！