上集同大家探討咗談性教育嘅時機，大部分家長都依然會覺得「喂，成件事好尷尬啫……」無錯！就係咁尷尬㗎喇！
咁當父母尷尬得難以啟齒，應該點算好？！看看下面美國兒童及青少年科學專家Dr. Hina Talib與青少年專家Vanessa Kroll Bennett給家長的建議。
迷思：尷尬即係仲未ready講，不如等我做多啲心理準備先？
面對青春期相關嘅討論，有時家長可能因為感到尷尬唔自在，覺得難以宣之於口，尤其係呢啲家長小時候都好可能無接受過呢類性教育，於是「拖延症」發作。
但事實係，我哋永遠唔會有「完全準備好」嘅時刻，而當家長愈忌諱談論性與身體時，可能會不經不覺加重孩子對於身體嘅羞恥感。愈唔講，日子久了反而愈難處理。
唔知大家有無睇過電影《在晴朗的一天出發》（A Beautiful Day in the Neighborhood）？電影取材自一個真實嘅美國兒童節目，其中兒童節目主持Fred Rogers有一句話可以作為我地嘅提醒——「所有能夠用語言把握的，就是能夠掌握與控制的（Anything mentionable is manageable.）。」
同孩子談論青春期與性，感到緊張同尷尬係人之常情。咁點好呢？專家有兩個錦囊。
第一，一字既之曰：「扮！」Fake it till you make it，畢竟如果你深信自己做唔到，咁就真係唔會做到。所以，即使你心如鹿撞，都要盡量向孩子展現出冷靜與自信，先可以好好幫助孩子建立正面健康嘅性觀念。
第二，接受呢件事就係咁唔容易，但同時可以試諗下：好多父母都同你一樣面對緊呢啲關口，你係有好多同路人㗎～
參考資料
Pearson, C. (2021, March 11). 5 Common Mistakes Parents Make When Talking To Kids About Puberty. HuffPost.
系列目錄
▪研究咁講｜跟孩子談性系列01：父母應該幾時開始同孩子談論青春期？
▪研究咁講｜跟孩子談性系列03：父母應該點樣同孩子討論青春期？
▪研究咁講｜跟孩子談性系列04：當孩子話「講你都唔明㗎喇」，父母應該點樣答？
圖片來源：Freepik, Pixabay