來到最後一回！就算家長一心準備好講性教育，都要好睇孩子係咪願意接收，假如孩子覺得你唔明白佢，你又會有咩反應？
快啲睇下美國兒童及青少年科學專家Dr. Hina Talib與青少年專家Vanessa Kroll Bennett有咩建議～
迷思：點會唔明呀？以前嗰時我哋咪又係咁。
家長可能會套用自己青少年嘅經歷去同孩子談論青春期，咁樣的確可幫助家長代入子女角度，但請留意返：今時今日嘅社會，已經同你的少年時代有很大出入了～如果只係用「想當年」嘅方式教導孩子，可能會令佢哋覺得父母並無嘗試真正咁了解佢哋，或者會令佢哋更加聽唔入耳。
其實諗深一層都知，生於唔同時代，青少年講咩話題、社交模式、獲取資訊嘅方式都會有唔同。現今青少年喺百花齊放嘅社交媒體之下成長，有啲嘢就算你同學校都未講過，可能佢哋已經早一步聽過，對性嘅知識分分鐘嘅比你想像中多！之但係家長如果唔同孩子討論，可能佢哋連有不正確嘅觀念都唔知……可以點做？
今時唔同往日，要好好觀察孩子而家面對緊咩～
時移世易，作為家長要嘗試理解孩子現今所面對嘅環境。例如網絡世界發展迅速，孩子可以透過很多途徑獲得兩性關係嘅概念，甚至好容易就可以接觸到色情資訊，最重要係，呢啲資訊好大可能係錯誤的，孩子卻又未有足夠能力判斷。
根據英國2014年一項調查，11至14歲青少年中有三分之一曾經於流動裝置上看過色情片。而家計會2016年嘅研究報告亦顯示，本港中學生觀看色情物品嘅數字有上升趨勢。
當孩子無可避免要與網絡世界相處，家長可以做嘅就係幫助孩子建立良好觀念，並接受孩子有可能已在網上接觸到與性相關嘅資訊，盡量不帶批判地與子女談論，令孩子感受到家長的理解。
參考資料：
- 香港家庭計劃指導會.（2017年6月12日）。 「二零一六年青少年與性研究」報告.
- Blake, B. J. (2014, February 11). Mobile porn access “damaging” children and teenagers. BBC News.
- Pearson, C. (2021, March 11). 5 Common Mistakes Parents Make When Talking To Kids About Puberty. HuffPost.
系列目錄
▪ 研究咁講｜跟孩子談性系列01：父母應該幾時開始同孩子談論青春期？
▪ 研究咁講｜跟孩子談性系列02：當父母尷尬得難以啟齒，應該點算好？！
▪ 研究咁講｜跟孩子談性系列03：父母應該點樣同孩子討論青春期？
圖片來源：Freepik, Pixabay