好多父母自己湊BB，樣樣嘢親力親為，照顧得佢妥妥當當。但竟然有研究發現，有一樣嘢托兒所竟然仲做得好過爹哋媽咪？
加拿大阿爾伯塔大學（University of Alberta）一個研究發現爸爸媽媽自己湊嘅BB，無論係對住電視定電腦遊戲嘅時間，竟然都比託兒中心長大嘅BB更長！
其實，好多父母自己湊BB時，忙到一頭煙，去到走投無路，就會向屋企部電視或者自己部手機求救！
最慘係BB「習慣成自然」，壞習慣隨時一路去到讀小學都戒唔甩！美國一個研究顯示，如果小朋友喺兩歲前，每日花多過兩個鐘頭睇電視，咁佢去到6歲大時，都會有較大機會繼續日日睇多過兩個鐘電視。
雖然兩個研究都係針對外國父母，但係喺香港其實都有同樣問題。「學童體適能高峰會2017」調查咗香港幼稚園學童嘅「屏幕時間」，發現佢哋喺上課日同周末，每日平均會對住個mon分別125分鐘及115分鐘左右，超出國際建議水平大約一倍。
所以話，爸爸媽媽有時都唔可以掉以輕心，要留意返自己有無喺唔為意嘅情況下，令小朋友染上咗壞習慣，並且要及早改善呀～
資料來源
- Carson, V., & Kuzik, N. (2017). Demographic correlates of screen time and objectively measured sedentary time and physical activity among toddlers: a cross-sectional study. BMC Public Health, 17(1). doi:10.1186/s12889-017-4125-y
- Certain, L. K., & Kahn, R. S. (april 2002). Prevalence, Correlates, and Trajectory of Television Viewing Among Infants and Toddlers. American Academy of Pediatrics, 109(4). doi:10.1542