將「車車」講成「呠呠」，對BB的影響是好是壞？

好多人都知道「BB話」（又名「兒童導向話語」 ）有助BB發展語言能力，但係有啲家長卻會將佢同錯誤發音混淆，如果教錯咗，隨時得不償失架。

兒童導向話語有以下特徵：
1. 句子精簡
2. 語速較慢
3. 語調較高、較多抑揚頓挫
4. 語法簡單
5. 帶重複性
6. 少用代名詞 （例如： 我、你、佢），多用名字代替
7. 多用具體有形的名詞（如：波、碗，而不是風、光）
8. 配合身體語言
9. 時刻留白讓小孩子回應 （註：有時孩子一個眼神已是回應）

除以上9項傳統「兒童導向話語」特徵之外， 2018年剛有英國研究證實，以簡單發音代替名詞，都一樣幫到幼兒學講嘢架，例如係稱「狗」為「汪汪」、稱「車」為「呠呠」。

之不過，將「車車 」講成「爹爹」就唔係「BB話」，而係咬字不清同發音錯誤。

有時，BB因口肌未成熟，仲未發到某啲音，大人聽到會覺得好可愛，但千祈唔好貪得意模仿BB的錯音，否則BB以為「爹爹」係啱，就只會一直讀錯。但大家都唔需要直接糾正孩子，迫佢跟你講一遍，你只需要重複一次正確的發音便可，就好似以下示範咁：

BB：「爹爹，爹爹」
爸爸媽媽：「係喎，嗰邊有架車車，紅色嘅車車！」