#191 Venus （女兒，3歲）
「我、老公和女兒3人，與我的爸爸媽媽同住。家裡不大，卻因為3歲的女兒，放滿了毛公仔。
不能帶回家的毛公仔
有一日，我跟女兒去嫲嫲爺爺的家探望。那裡有兩個堂哥留下的很多毛公仔，不過因為堂哥已長大，不太玩公仔了，所以嫲嫲給了女兒其中一隻，那是一隻巨型的紅色Elmo。
我女兒玩得非常開心，明顯跟這公仔墮入愛河了，嫲嫲見狀就建議她可以送她帶回家，但女兒聽到後，反應有點奇怪，跟平時不一樣，明明之前肯定滿心歡喜一口答應。
女兒說：『唔可以帶返去，因為屋企已經好多公仔，而且公公話過，唔好再喺嫲嫲度帶玩具返屋企喇。』
當我們準備外出吃飯的時候，女兒向嫲嫲問：『我可唔可以帶埋個公仔出去啊？』
嫲嫲一口答應，女兒就將她心愛的BB車讓給Elmo坐，而且一路上都把Elmo當作自己孩子般照顧，既給它吹風扇，又幫它『冚被』。
欲言又止的請求
吃飯期間，我女兒問了我幾次：『媽媽，我哋一陣會唔會上嫲嫲屋企呀？』
我告訴她，飯後我們會直接去地鐵站。女兒聽到後卻堅持我們可以送 Elmo回爺爺嫲嫲家，然後才回自己家。
至今我仍然不以為意，很平常地回答她：『一陣嫲嫲會用環保袋載Elmo返屋企㗎喇，唔洗擔心。』
但是當去到地鐵站，女兒又重複同一個問題。這時，我才真正覺得有點不對勁，便問她是不是有話說。女兒沒有出聲，但看起來很不開心。
我又追問：『你係咪好想帶Elmo返屋企？ 』『係呀，但公公話唔好再喺嫲嫲度拎公仔返屋企。』一臉快哭出來的女兒回答說。
我心中不忍，便跟她提議了一個折衷方案：『嗱，不如咁啦，我哋帶Elmo返屋企，但下次去嫲嫲度嘅時候，就要攞返佢去嫲嫲度，得唔得？』
女兒答應了。我以為事情告一段落。
小小的人兒，多多的顧慮
到我們上了車，女兒看來依然很煩惱，便聽她說：『媽媽，我哋搵個地方收埋Elmo，唔好俾公公見到。』
我當時一聽到，即時閃過的念頭是：『阿女你想講大話？』
但隨即有第二個問題在腦中出現：『點解佢會咁諗？』
所以我問她：『你諗住收埋去邊？』『收埋喺架BB車後面。』她動動腦筋後答。
然而，Elmo有女兒這麼高，BB車是擋不住Elmo。
我問女兒是不是擔心公公看到Elmo，而女兒答道：『係呀，我怕公公見到Elmo 唔開心，但我又好鍾意Elmo。』
經歷了數小時的糾纏，此刻我才恍然大悟：『哦，你好想Elmo陪你，但你又驚公公見到唔開心，所以你就諗住收埋隻公仔，咁公公見唔到就冇事啦？』
女兒：『係。』
我：『但Elmo咁大隻喎，公公一定會睇到，不如媽媽同你一齊諗第二個方法啦，好唔好？』
女兒：『好……』
擔當和事佬的媽媽
趁女兒認真思考時，我打了電話給公公，悄聲地交代了來龍去脈，並讓公公思考一下如何跟女兒商量，更提醒他女兒情緒低落，說話要小心一些。
一打完電話，女兒就問我的意見。
我說：『媽媽認為，你可以直接同公公講，你喺嫲嫲度攞咗Elmo返嚟。下次去嫲嫲度，你會帶返佢去嫲嫲度。你直接同公公講，無問題嘅。』
但女兒看起來半信半疑，似乎很怕公公會罵她，奇就奇在她平常完全不怕最疼愛她的公公，有什麼都要跟公公分享，甚至敢跟他吵架。女兒思考中途還睡著了一會，當醒來時，公公已經陪在她身邊。
女兒見到公公，並沒立刻跟他講。我就去到女兒身邊，說：『你係咪有嘢要同公公講？你直接同公公講，媽咪陪你，有咩事媽咪喺度。』
她完全是一臉被出賣的表情，像說著『媽，你做乜嘢講出嚟？！』
膽戰心驚地跟公公坦白
女兒吞吞吐吐地說：『我喺嫲嫲度帶咗Elmo返嚟。佢嚟屋企住一日，星期日帶返佢去嫲嫲屋企。』
我補上了一句：『住一日咁少？』
公公：『哦，佢嚟住一日，係咪即係聽日走？』
女兒：『唔係呀，下次星期日去嫲嫲度，會帶佢返去。』
公公：『即係下次你去探嫲嫲嘅時候，你係唔係會帶Elmo返去？』
女兒：『係！』
這時候，Elmo終於在我們的家登場了！
公公：『咁大隻嘅？咁佢瞓邊啊？』
女兒：『佢瞓床尾。』
公公：『咁佢就瞓床尾啦！有乜嘢你同公公講，我地一齊傾。』
頓了頓後，女兒開始哭了。
女兒：『我怕公公鬧，公公講過唔好再拎公仔返嚟。』
公公：『公公唔係樣樣野都鬧你嘅，有乜嘢你同我講啦。』
之後我無從得知他們的談話，總之當晚他們一大一小一起跟Elmo玩得很開心。
小人兒原來已經長大
我深切體會到女兒真的成長了許多，她的心境竟可以如此矛盾複雜。
即使是很想要的東西，女兒也會因為考慮到屋企人的感受，而選擇不帶回家，並且想方法增加同Elmo相處的時間。當女兒帶Elmo回家，她嘗試找出兩全其美的方法，怎樣能與Elmo玩的同時，而公公又不會因此而不開心；藏起Elmo，應是她想到最好的方法。
我女兒展現出推己及人的一面固然讓我開心，但怎樣教養正急速成長中的她，又察覺到她細膩的感受與心思，卻是我要好好思考的問題。
好比今次事件，只要有一環沒有做到，我就會錯過女兒的想法。想想就覺得壓力山大。不知大家在教養孩子時有沒有同樣的感受？」
圖片由受訪者提供