#118 @我家有個過動爸（兒子，5個月大）
「上年一個平凡嘅晚上，成為咗扭轉我人生嘅一個夜晚。
當時我們一家三口（阿仔仲喺媽媽肚裡）坐喺梳化到睇電視，剛巧電視播放著一套關於成人ADHD 的紀錄片，我一路睇一路同我太太講：『我都係咁喎！』『咁似我嘅？』『Exactly！』……
我從事與旅遊有關的工作，大概有12年了，日常職務包含著大量文件處理。但過往直至現在，在處理一些細節上面，無論怎麼小心都總會有一些錯漏，可能你會說，誰人無錯？但當同一錯誤不斷重覆發生，再好脾氣、再有耐性的上司都會無言，連自己都問自己『為何又是這樣錯？』時，成個人真係灰到一個點。我不知那時的狀況是否抑鬱，我只知道我需要找出原因，但怎樣找呢？
我太太從事教育行業，亦有長時間接觸過特殊教育需要（SEN）的學生。
萬一將來，我的兒子真的遺傳了ADHD，我都會以平常心面對。因為佢會知道呢個世界上，至少有爸爸一個人明白佢。
睇完之後，我問我太太我係咪ADHD，作為一位專業及謹慎的教育工作者，她的回覆是：『你有呢啲特徵，但我唔可以話你係，只有經過診斷，才可由有關專業人士確認。』那我便追問哪裡可以提供診斷服務？太太托一托眼鏡：『如果係小朋友，學校都會有社工或教育心理學家跟進。但成人應該要去精神科醫生那裡測試。』
精神科醫生，很多人聽到都覺得怕怕，以為是『黐線』的人才會去睇。但我覺得精神同身體都一樣，都會有病的時候，一般人傷風感冒嚴都會去看醫生，為什麽精神健康受到困擾時卻不去求醫？
平生第一次見精神科醫生，感覺有啲興奮（ADHD的人就是鐘意新奇嘢）。等咗陣就入去見醫生，過程中佢講吓ADHD係乜、點解會有ADHD，又問我工作、讀中小學嘅情況係點樣，當然都要做問卷。醫生好快就確診咗我有ADHD（其實而家大咗，可以只係ADD），建議我服食能幫助我專心的藥物，同介紹嗰種藥的原理和食法。
診症用咗大約一個鐘，但時間過得好快，對我來講都係吹水，但又好有幫助。我最記得醫生說了的一句話：『如果當年你有被確診係ADHD，又有適當的訓練和幫助，你今日的成就可能會更高。」不謀而合的是，我早兩天看的紀錄片，裡面的受訪者亦這樣說過。聽了這句話，自己活了三十幾年，感覺彷彿之前走了許多冤枉路；但另一方面，我也知道過去的不能改變，未來卻可以再由自己掌握。
『咁兒子的未來呢？』問題在腦中閃現。
我和太太都知道ADHD遺傳的機會好大，太太當然希望兒子能如普通人一樣，但我抱著平常心，萬一將來，我的兒子真的有ADHD，作為父親，都作為過來人，我有信心能夠扶助他，等佢行少啲彎路。更重要係，佢會知道呢個世界上，至少有爸爸一個人明白佢。
我帶著希望步出醫生房，同時亦被迫放下一些東西——幾千蚊醫藥費，私人精神科醫生係貴啲，希望遲啲排到政府專科……」
圖片由受訪者提供