#180 Sarah（女兒，19個月大）

「我想大叫：媽！我得咗呀！好啦，我已經準備被人笑，有咩好大驚小怪？

從來無諗過BB可以唔扭計！
從來無諗過BB可以咁自覺！
從來無諗過BB可以咁錫媽媽 ！

究竟19個月嘅佢做左啲咩令媽媽咁感動？

體貼自覺的女兒

– 朝早起身，佢拎眼鏡俾媽媽戴，媽媽洗完面拎爽膚水俾媽媽，令我享受慈禧待遇；
– 媽媽煮緊嘢，佢好乖咁拎住食物或玩具係廚房一角坐低等；
– 唔小心倒瀉水，佢即刻講sorry，拎紙巾抹乾，或者拖返個地，食完嘢自覺去洗手；
– 出街玩完返屋企，佢好攰，但無扭計，只係靜靜地俾媽媽抱住，同埋話俾媽媽知佢想訓覺；
– 媽媽想飲可樂，但唔想BB知道可樂係快樂神仙水，所以扮苦，佢即刻喊哂口叫媽媽唔好再飲；

我完全無諗過BB年紀細細，就可以識咁多嘢，仲咁體貼，令我好感動，好愛佢。生咗佢真係好。

拒絕合作派

可能有人以為我運氣好，生著個女咁純品，其實佢曾經都係拒絕合作派。自6個月大開始，佢自我意識開始強，會有自己主意，想自己做好多嘢，於是扭計更嚴重。

沖涼？No！
訓覺？No！
換衫？No！
No！No！No！總之就No！
咩話？一定要做？我典地囉！喊囉！崩潰囉！

但後來我慢慢發現，好多時佢會哥斯拉式爆發，係因為我唔了解佢，仲覺得佢曳，所以佢想俾我知佢好委屈。

就好似有一次沖涼，平時慣曬係固定時間沖涼嘅佢突然堅決say no，又尖叫又喊，但我完全唔知原因，當然會有啲嬲。點知呢，後來某次開左浴室寶，成個浴室暖笠笠喇，BB竟然好開心咁除曬衫去沖涼。於是，我先發現：『會唔會係因為天氣太凍，所以佢先唔想除衫沖涼呢？』

做父母嘅因為了解自己仔女，通常多觀察同諗一諗就會知道扭計原因，但有時好似沖涼呢件事咁，都要靠機緣巧合先發現到，亦無可能次次拆得掂，尤其係BB仲細未識用把口去表達。

堅持與妥協不是二選一

幸運地，喺我刻意訓練之下，BB比較早識講嘢，更喺18個月時已開始組織句子。自此BB扭計時，我唔需要再靠估，而係可以直接同佢溝通。

佢仲識得講數，每當呢啲時候，我唔會立刻否決佢，而係睇下有無可以遷就嘅地方，呢種方式令佢就更識得表達自己嘅訴求。

而我都喺堅持規矩之餘，又會有一定程度嘅退讓。例如我規定只可以食正餐，就算BB話肚餓、扭食嘢，我最多只會早啲煮下一餐，唔會俾佢餐同餐之間食零食。有時候大家一人退一步，互相妥協下，BB喪扭嘅情況就少咗好多。

對比返一年前嘅情景，我發現，嘗試用啱方法同小朋友相處，佢會俾好大回報我。

佢未到最『曳』既年紀，不過我對佢有信心，佢而家嘅表現令我相信，佢可以同我合作得好好。（有經驗嘅媽媽comment請留手，我仲想抱返小小美麗嘅幻想）

人生，仔都生埋，仲有咩做唔到？」

圖片由受訪者提供