如果大家有記憶，去年年中我哋分享過前編輯Kathy睇SPYxFamily嘅體會～
當時佢不斷叫其他編輯都快啲睇，今次終於到我入坑！
超短簡介
間諜洛伊德為咗完成任務，領養咗得4、5歲嘅ANYA，佢並唔知道ANYA原來有讀心嘅超能力，後來佢又搵咗約兒扮成佢太太，當然，佢亦唔知道約兒原來係殺手嚟。一家三口，懷著各自的秘密，盡力過平凡的生活，每一集都充滿Parenting嘅元素！
如果我們願意相信孩子已盡力
我最有記憶嘅一幕，係ANYA跟住間諜爸爸洛伊德嚟到佢工作嘅醫院做義工，不過佢不斷幫倒忙（食嘢唔做嘢，做嘢打爛嘢），被人請走，就呢個時候佢用超能力發現了有個小朋友喺復健泳池度浸親。
ANYA陷入兩難：如果直接同洛伊德講，就會曝露自己有超能力嘅事，但佢又好想拯救個小朋友。千鈞一髮之際，ANYA決定做一個「百厭」嘅小朋友！佢大叫「ANYA好想游水」，就衝咗去泳池，成功引起大人嘅注意，救返個小朋友。呢個亦係4歲嘅佢能力範圍內能夠諗到嘅最佳方法。
類似嘅劇情都經常出現，因為ANYA有讀心嘅超能力，所以佢知道好多事，但始終得幾歲人仔嘅佢，有時會誤解搞出個大頭佛，有時又會用佢小朋友嘅認知，幫忙變成幫倒忙。而因為我哋有觀眾嘅上帝視覺，知道佢行為背後嘅心思，所以永遠嬲佢唔落。
了解孩子行為背後的原因靠觀察和溝通
睇到呢度，我就會想起現實生活中嘅親子相處。
試想想，如果你嘅小朋友無啦啦甩開你拖住佢嘅手，橫衝直撞，話要去泳池度玩，爸爸媽媽唔激到爆炸就奇了。但SPYxFamily中嘅洛伊德，明明不是ANYA的親生父親，也不知道佢嘅超能力，卻一心要成為一位好爸爸去完成間諜任務，所以總係會用盡全力咁去理解ANYA各種奇怪嘅行為。
這是一個很好的提醒。
喺現實世界，我哋一樣無超能力去睇透小朋友行為背後嘅種種原因，但就好易會喺未搞清楚小朋友嘅意圖，就先下咗結論：佢懶、佢包拗頸、佢貪玩……其實孩子都有好多內心小劇場，行為背後總有原因，而正因為我哋無讀心嘅能力，不是更應該要好似洛伊德咁，透過仔細觀察同埋溝通去理解孩子嗎？
下次面對小朋友令人哭笑不得嘅行為時，不妨停一停，細心諗下佢會唔會係有原因先咁做呢~？