「媽咪！媽咪！風風又打心心喇！」
我得一個女，佢叫妮妮，但阿女每日都會話我知風風同心心做乜事。佢哋好嘈，唔講我以為自己生咗三件。
風風是個男孩子，六歲，十月生日，性格衝動，貪玩，經常大蝦細；心心是個女孩子，四歲，一月生日，性格內向，細膽，經常被風風蝦。佢兩位並唔係我哋嘅鄰居或者阿女同學，但成日失驚無神喺我屋企出現，又會突然消失。
我以為阿女Short咗
仲記得佢哋第一日出現喺我屋企嗰陣……
「打你！打！打！打！」
「唔好打我呀！」
「風風唔可以再打心心啦！」
「嗚⋯⋯」
房間無啦啦傳來三把一樣嘅聲音，行入房，畫面就是阿女的左腳在踢右腳，然後佢自行配音。
我第一時間的內心OS：佢係咪short咗？
我當然沒說出口，只是問她在做什麼。
她說：「媽咪，風風打心心啊。」她繼續左腳踢右腳。右腳輸了，還會哭。
「心心好痛啊，你錫返佢吖～」然後，佢「隊」隻腳埋嚟，要我錫。
好吧。錫完大概知咩事了。
無人陪你玩？朋友請自備
妮妮是獨女，以前我們和表弟一家同住，家裡總算有玩伴。後來搬家，她做回真獨女了。但我不知道，原來她自備了兩個「朋友」，一同搬過來。
話說阿女有兩隻腳（廢話），左腳腳趾尾上突然長了一粒墨，我說笑它像「八婆墨」，自始她就覺得那隻腳很搞笑，成為了「風風」的原形，另一隻腳是「心心」，又白又滑，純如白雪。
這兩個「小朋友」不時會在我家打打鬧鬧，戲碼離不開風風蝦蝦霸霸，欺負心心。我快要錫心心錫到戀足了。
直到最近，風風變了。
焦慮是怕瀨尿怕到唔飲水
我們初到英國，阿女未能用英文好好表達自己，令她在學校有過一次瀨尿經驗。嗰次之後阿女出現咗焦慮情緒，不但開始抗拒上學，仲全日唔敢飲水，一有機會就唔急都狂去廁所。
我們第一時間向阿女承諾會盡力幫助她，又跟學校溝通，增加安全感；早上會早點起床，和她一齊開心食個靚早餐，有時更會啪返粒朱古力，營造愉快的上學氣氛；又邀請阿女在家做小老師，教我們英文拼音（橫掂我真係唔識），希望令她有返自信心，有足夠勇氣去面對困難。
不過要過呢關真係唔易，幸好，這時有「人」伸出援手。
想像中的好朋友——成長中的必需品
嗰日好不容易氹咗佢返學，仲苦瓜乾咁嘅面口，點知嗰晚：「媽咪，今日心心好叻啊！佢問同學可唔可以同佢一齊玩啊。」她單起右腳跳來跳去。
「嘩！心心真係好勇敢喎！」內心OS：心心唔係你自己咩…？
「係風風教佢㗎。」她遞出她的左腳，丁起來。腳趾尾粒八婆墨特別顯眼。
「風風好照顧心心喎。」內心再OS：咩事，風風咪又係你…
就是這樣，每天風風都會教心心如何與老師同學對答，有時候心心受傷風風更會安慰她。慢慢地，風風變了一個開朗、會照顧別人的大哥哥。他帶著心心，一步一步的適應著校園生活。
雖然一開始有啲靈異，我真心懷疑過阿女係咪Short咗，但後來想起了《Inside Out（玩轉腦朋友）》中，都有一個主角自己創作出來的朋友仔「乒乓」，不是嗎？乒乓除了是主角兒時的唯一玩伴，更在重要關頭時，為了幫主角走出情緒困擾而犧牲了自己！我發現，原來 imaginary friends 在童年階段出現是十分普遍，而且有啲用處。
雖然阿女的虛構朋友係兩隻腳，仲要有粒八婆墨，好騎呢，人哋嗰啲明明係可愛兔仔貓仔大笨象，但記得嗰日我苦惱緊要唔要迫阿女返學，佢無啦啦話：「媽咪，風風佢話好想返學啊！」我就知道，這個「朋友」又做緊嘢喇。
🖼️：Pexels