太太，過去嗰九個月辛苦你了。
由認識你起，我已經覺得你係一個好叻嘅人，因為你從小就已經要擔起頭家，行事果斷、有分寸、又上進。無論遇到任何重大嘅事，你總能夠沉著應對。坦白講，有好多時我都自愧不如。
我無法想像的痛，讓你失去了平日的沉靜
但我諗喺我認識你嘅呢十幾年裡面，我覺得你最叻嘅時刻，莫過於係剛剛嗰十幾個鐘裡面，亦即係由你開始陣痛到生產嘅呢段時間了。
我之所以認為你叻，並唔係因為你唔怕痛又或者好忍得痛。事實上，我知你其實好怕痛。而亦正因為你怕痛，但仍然可以完成順產 8 磅 B 呢個使命，我先覺得你叻。
起初你未開始痛時，我哋都仲可以傾下計，講下笑。但後來陣痛開始後，情況就唔同晒。你嘅冷靜沉著，一下子拋到九宵雲外。每次宮縮所帶嚟嘅痛楚，完完全全響你嘅表情上反映左出嚟，同時你亦都完美咁展現出乜嘢先係真正嘅「痛到捵床捵蓆」。
漫長的疼痛，不知何時才會結束
每次陣痛過後，你都會鬆一小口氣，趁空檔期盡量放鬆休息，同時又戰戰競競咁等待下次痛楚嘅來臨。而我亦只可以盡量同你講：「走㗎喇！走㗎喇！痛完架啦！忍多兩秒…」之類嘅說話。
陣痛嘅初段，你都仲有少少反應，識應下我。但去到中段時，你好似已經再無多餘嘅氣力去講嘢。
我望住你一次又一次咁痛，望住你當時痛到死去活來嘅眼神，我實在無法想像呢種係一種點樣嘅痛，更加冇辦法想像你係點樣響一個唔知到自己要痛到幾時先會停嘅心理狀態下一次又一次咁撐過去。我諗我呢一世都唔會畀自己忘記。對我嚟講，呢個影像實在太衝擊了。
孩子終於出生，你也成為了母親
就係咁，呢種漫長嘅陣痛狀態無情地持續咗7、8個鐘。而且，咁都仲未完。
因為過後先至嚟到最重要嘅環節——正式生產。
相比之下，生產時因為可以用力發洩，感覺上好似會比陣痛時齋忍好少少，但係實際上，痛嘅程度應該係有增無減。經過好幾次嘅出力嘗試，仍然未有好大進展。助產士開始商量是否要產用吸盤將孩子吸出嚟。
我望望鐘，經過漫長嘅陣痛洗禮，原來已經去到接近夜晚 11 點，平時 10 點就需要瞓嘅你，應該已經好攰了。再加上因為要「催生」而全日唔可以進食，對三餐定時，唔習慣捱餓嘅你嚟講，我都開始擔心你仲有無力生產。
但係好彩，喺之後嘅嘗試，都漸入佳境，孩子嘅頭終於出到嚟。然後，喺幾名助產士一連串純熟嘅動作之下，孩子終於由你嘅肚入面出咗嚟了。
而我所見證到嘅，唔單止係孩子嘅誕生，仲有一位偉大媽媽嘅誕生。
雖然仲有我成為爸爸，但係由懷胎到生產，我需要付出嘅嘢有幾多，大家心照啦…0.1%畀多我了，其餘 99.9% 都係由你一點一滴咁累積出嚟。
我會為你銘記成為母親的痛
我望住瞓響產床上如釋重負嘅你，聽到孩子出世後嘅第一下喊聲時，臉上泛起嘅微笑，呢個畫面，同之前嘅陣痛時嘅表情真係一天一地。呢一刻相信係我見過最靚最動人嘅畫面。我實在好慶幸自己可以在場親眼目睹一切嘅發生（仲有可以負責剪彩添，即係剪臍帶）。
雖然，好多人都話，當媽媽見到自己BB時，之前所有嘅痛都會忘記得一乾二淨，或者你真係已經唔記得左。不過，我一定會記得。
順道我都要同我媽媽講句多謝，生仔呢家嘢…大家見過之後就知女人有幾利害了。