「老豆，有件事一直都無話你知。
中四中五嗰兩年去咗間新校，我學業好返啲，但其實去到中四下學期，我畀班入面嘅人杯葛咗足足有大半年時間。依家睇返轉頭，當然係因為佢哋幼稚，但對當時只得 16～17 歲嘅我嚟講，真係好大困擾同煎熬。
而最難受嘅係我無人可以傾訴。有好多次都想講畀你同阿媽知，不過我估你哋大概，都係會叫我唔使理佢哋，讀好啲書就得，所以最後都係扮無嘢發生。
留學時期｜我從前不知道這件事有多難
亦都係因為呢件事，我先會同你講話我想去外國讀書，睇吓呢個世界。依家諗返，我要由衷咁多謝你送咗我出國讀書。
記得嗰陣你無乜遲疑就話只要我考好個會考，就可以去。所以少不更事的我當時真係好單純咁以為只要我肯過去就得，但事實係——乜都係錢嚟。
其實諗返，你對我同細佬都一樣，好多時只要我哋講一句，你就會義無反顧咁為我哋付出，即使你背後要做嘅嘢有幾咁難，你都唔會介意。如果無你嘅堅忍同努力，我同細佬絕對唔會有今日嘅一切。
你永遠都係我哋最應該多謝嗰位。
大學時期｜如何才能當一個像你這樣的父親？
感激嘅仲有太多太多。
當時一心諗住入大學讀建築，點知讀咗一年之後發覺唔啱自己，於是硬住頭皮咁同你講話話要轉讀電腦，嗰陣仲要係科技股泡沬時期，你當然嬲啦，仲話讀電腦係無鬼用，但最後你都無反對，只係話如果我真係諗清楚嘅話就轉啦。我唔肯定你當時心係咪真係咁諗，但係你肯對我講出嗰句說話，我已經好感激了。
而好彩嘅係，我轉呢次科，係正確嘅決定。因為讀電腦果幾年，我完全唔覺得辛苦，而且仲好享受，我亦係到嗰陣先真正明白讀書本身就應該係咁。
如果當年無你嗰句嘅允許同支持，我又會行一條點嘅路呢？真係好難想像。
不過講開又講，我原本諗住讀完大學都已經夠皮啦，你竟然仲叫我讀埋個碩士先好返香港。嘩，我真係發夢都無諗過要讀碩士，我同細佬讀咗咁多年書，又喺外國生活咗咁耐，到底你畀咗幾多錢出嚟呢？呢條數真係唔識計。我打從心底裡佩服你點可以做得到。
如果換咗係我，我又能唔能夠好似你咁堅持到呢？就算呢刻我已經做咗人爸爸，我都好疑惑……
謝謝你一直如大山一樣可靠
我一直無講出口嘅說話，就係『多謝你』。
讀完書返嚟無耐我就結婚，雖然結婚有好多鎖碎事要煩，成個過程都有大壓力，有時會不自覺咁發咗脾氣，不過你由頭到尾都無話過我啲乜，反而仲出心出力幫忙。我知道所有嘢都唔係必然。
到細佬結婚，你又係好著緊，乜都想幫忙出返啲力。我同你講唔使咁擔心啦，大家都大，有分數架喇。我知老豆其實你係真係好愛我哋兩兄弟，同埋我哋嘅另一半。
老豆，我依家再睇返轉頭，一直以嚟，你就好似一座山咁。雖然你唔係好識得用言語去表達你嘅愛，但係你已經從你嘅行動之中體現咗對子女嘅愛嘅定義。無論我有咩事，有咩困難，去到我真係覺得搞唔掂時，我都總會想起你，而我亦都知道只要我一搵你，你一定會幫我。
你就係一個如此可靠嘅爸爸。如果第時到阿仔大咗，喺佢有困難時會咁樣諗起我，我就會知道自己都做得唔錯了。
是現在還是已錯過｜我想追回跟你相處的時間
老豆，喺我眼中，你已經做得好好了，我好幸慶能夠有你呢位爸爸。
雖然我細個嘅時候，無乜機會親近你，早就習慣咗同你相處時都係聽你講嘅多，我自己講嘅少。但感恩嘅係，我返咗香港之後同你嘅關係其實已經拉近咗好多，我哋都有好多屬於我哋之間嘅回憶，好似一齊去旅行，搵埋細佬一齊去鋸扒。呢啲時光，我會好好記住。
其實我仲有好多說話想講，不過每次見到你時，又會好自然咁吞返落肚。唔知係咪所有仔女對住爸爸都會咁，所以我唯有寫畀你，我希望你可以感受到我咁多年嚟對你呢位爸爸嘅情，我對你有幾崇拜，有幾尊敬。
你例牌會話：『得架喇，我知你哋兩個好生性。』但係有啲說話，我覺得一定要表達出嚟。
老豆，我衷心希望今次呢個難關我哋可以一齊跨過去，雖然你唔想我哋太過擔心，你仍然好想用你嘅方法去保護我哋，免我哋難過。但係我哋都想你知道，我哋同樣可以去保護你，畀力量你。
你要好返呀，爸爸。」