女：「爹哋，點解你今日著便服返工嘅？」
科豆：「因為今日係星期五，係便服日，所以爹哋著便服。」
女：「咁點解你上星期五又唔係著便服嘅？」
科豆：「因為上星期五爹哋要見客，咁咪唔可以著便服囉。」
女：「咁點解見客要著返工衫？」
科豆：「因為見客要整齊同斯文，所以咪要著返工衫囉。」
女：「咁點解⋯⋯」
科豆：「爹哋要返工啦，你先記住啲問題，我放工返屋企再詳細解釋你聽幾時要著乜嘢衫啦，好唔好？」
雖然阿女一路問，我一啲都唔覺得煩，仲覺得佢好可愛，好想可以慢慢解答，但眼見再唔出門口就可能以後都要喺屋企慢慢答佢問題，我只好忍痛離開個女……去返工！
不過係返工嘅路上，我仍然記掛住阿女嗰顆好奇心。筆者希望女兒能一直維持這顆好奇心，成為她學習和取得成就的重要支柱！究竟好奇心有幾咁重要﹖密歇根大學兒童醫院對6,200名幼兒的數據進行左研究，發現有較高好奇心的幼兒，在幼稚園時已有較高的閱讀及數學能力。最重要係無論係富有或貧窮嘅家庭，又或是對專注力高或低嘅幼兒，好奇心同閱讀及數學能力的關係都一樣存在！
簡單啲講，就係對於就讀幼稚園的幼兒，有好奇心會增強他的閱讀及數學能力。為此，筆者又點夠膽磨滅小女的好奇心？
咁點先知個小朋友仲有無好奇心？
負責這項研究的兒科醫生Shah就指出，當個小朋友仲有對尋求未知的熱誠，有探索新知的衝動及有發現答案時的快樂，咁佢嘅好奇心仲係得以維持！
所以，當小朋友問題多多，多到你煩，多到你已無時間去答嘅時候，千祈唔好「一盤冷水照頭淋」，叫佢收聲或唔好問咁多，反而父母可以先叫佢記住個問題，再找一個適當及較空閒的時間，與他一同探索及討論那條因他的小小好奇心而不斷追問你的問題。
最後，對於Fashion只係識條鐵的筆者，借助了「Google大神」的神通廣大，用咗一個教人”How to dress for any occasion”的網頁，同個女詳細討論咩時候著咩嘢衫呢個大課題……不過有關Fashion嘅嘢，筆者都係強烈建議留番俾媽咪，因為無論點配搭，老婆都係會投訴科豆為女兒揀選嘅衫係唔襯嘅！
資料來源
- Michigan Medicine – University of Michigan. (2018, April 30). Study explores link between curiosity and school achievement: Promoting curiosity may be a valuable approach to foster early academic achievement, particularly for children in poverty, a new analysis finds.. ScienceDaily.