研究：接納孩子性取向，可能需要年計的時間

上兩星期見到編輯阿E篇《大叔的愛》，發現留言完全一面倒，大部分留言的父母都話「完全接納」孩子同性戀。同阿E傾開都覺得有點始料不及。

當中，仲要有不少留言都一針見血。
「唔接納又可以點？咪只係會無咗個仔！接納可能仲多咗個仔添！」

子女出櫃，父母接納孩子性取向有困難？

作為子女，遇上咁開明嘅父母，一「出櫃」就已經得到父母的接納，當然係福氣。不過，一個美國喬治華盛頓嘅研究，訪問咗差不多一千個10-25歲的年青同性戀者的父母，發現大部份父母由知道自己子女係同性戀嗰刻，直到用上約兩年嘅時間，佢哋嘅接受程度無乜改變。

即係父母一係一早就接納孩子嘅性取向，但如果接受唔到嘅，兩年內都未必有大改變。研究發現父母嘅接受程度通常在2年後先開始上升，而經歷5年時間，父母嘅接受度才有較顯著的提升。

研究的作者喬治華盛頓大學米爾肯研究所公共衛生學院的副教授David Huebner博士指出，父母初時不想接受子女是同性戀者，有可能是出於擔心孩子將來會面對更艱難的生活，包括受到朋輩欺凌或騷擾，也有可能父母只是需要一些時間來適應，因為他們早就為孩子預設想好了一個傳統的異性戀未來，組織一男一女的家庭，接著就是生兒育女。

消極反應可能賠上親子關係？

不過，好多時，我們人生中最缺乏嘅就係時間。如果要用上2年、5年先接納到自己孩子的同性戀傾向，父母同孩子嘅關係、或孩子自己嘅情緒感受又頂唔頂得住呢段咁長嘅時間呢？

同一個研究團隊，喺之前的研究已發現，在知道孩子的同性戀傾向後，如果父母拒絕接受或做出一些消極的反應，即使只是幾年時間，都會對親子關係造成影響。而這些父母不接納孩子的反應，與孩子將來出現抑鬱、自殺、藥物濫用的風險有一個正比的關聯。

「都甚麼時代了？」記得小時候的自己不時都怪父母唔夠開明。但做咗父母先親身體驗，父母其中一個最大的課題是學會放下自己的固有想法，讓自己走進子女的「時代」。

帶一條生命來到這個世界，又能認清這個生命並不是屬於自己的——這種悟性，也許是這新生命能發光發亮的基礎。