#169 徐姑娘（兒科職業治療師）

「我係一位兒科職業治療師，大家可以叫我徐姑娘。

我記得當年去大學open day，見到啲感統嘅遊戲好得意，加上自小鐘意小朋友，大學嗰陣就揀咗讀職業治療。一切好似好順理成章咁，但係真正令我對呢份工作有深刻體會嘅，係我嘅一位前上司——何姑娘。

我同何姑娘真正相處嘅時間唔算好長，我喺2016年認識佢，而佢喺2019就因病離世了。短短三、四年間，我由一開始好怕呢位好嚴肅嘅上司，到同佢成為亦師亦友嘅知交。

佢對我最大嘅影響就係——由佢口中，我知道咗自己同自己服務緊嘅小朋友，原來有好多共通點。

我是怕羞孩子的過來人

我有唔少個案都係一啲容易焦慮、好怕醜，甚至有選擇性緘默症嘅小朋友，睇到佢哋，就會諗起自己嘅小時候。

仲記得我K3升小一嘅時候，被送去託管，之後整整一年，喺學校同陌生環境，我緊張到完全出唔到聲；之後我轉校，又再一次出現呢個情況。

我細個時，職業治療仲未係好多人識，所以我只能夠靠時間同靠自己去改變自己嘅諗法，慢慢調節。到我中學已經好咗好多，後尾仲可以自己一個人去到澳洲讀書。所以我好明白當一個小朋友會緊張，會怕羞，唔係推佢出去試多幾次就可以，我哋需要耐性，更需要方法。

我慶幸因為過去嘅經歷令我自己唔止喺專業層面上幫到佢哋，仲可以身同感受小朋友面對嘅處境。對我自己而言，幫到佢哋有啲係彌補緊當日自己無人幫嘅小遺憾，所以滿足感特別大。

我仍然是個怕羞的人

雖然話隨住年紀，我嘅緊張情況已有好大嘅改善，但我都必需承認，我可能只係更加識得收埋嗰個會緊張嘅自己，有時都仍然會有困惑。

呢個亦係我感激何姑娘嘅原因。

佢喺我入職嗰陣，一眼就睇穿咗我，仲花咗好多時間聽我分享自己嘅故事，有時真係會喺Whatsapp度傾幾個鐘。佢令我明白到自己有時怕怕醜醜，容易緊張，並唔係性格問題，反而似我讀過嘅理論一樣，有啲人嘅腦部本身就會對『某啲刺激』特別敏感，成日啪著『緊張』呢個反應。

估唔到只係搵到個解釋，已經令我釋懷不少。

而何姑娘對我嘅影響，仲包括咗寫文章分享OT——即係職業治療呢個專業。佢年資深，亦係一位媽媽，特別明白SEN家長嘅難處，於是會寫文寫書，希望所知所識可以流傳下來，我亦係認識佢之後，開始幫手處理文稿，開始寫作。不過我寫嘅可能就會多啲小朋友嘅角度。

喺何姑娘身上，我真心感受到生命如何影響生命，而唔係一句口號而已。

依家，我會喺見case之餘，花時間做教材，答家長問題，其實都有少少係想繼承佢嘅志業。依家我甚至會分享自己成長，就係因為我發現當我哋願意Open Up去分享一啲自己嘅經驗，原來真係可以令其他人有得著。」

圖片由受訪者提供