「讚美」係一種藝術，仲係一種講時機嘅藝術

「讚美」係一種藝術，除咗自己要學點樣讚人，當然仲要教個囡點樣欣賞他人，從心而發咁表達畀對方知道，所以我對住亞囡成日都係「為善不甘後人」，一有機會就大讚特讚。

好似初初佢能夠成功喺potty 去wee wee 或者poo poo，我都會非常雀躍，然後好開心咁同佢打氣，有時見到佢出靚poo poo 更加會美言幾句（靚poo poo 代表腸道健康嘛）！

經過我一番努力，亞囡開始感染到少少讚美別人嘅美德，但係個 timing 就拿捏得唔係咁好…

話說某日朝早同亞囡出街玩，佢突然急wee wee，咁我就同佢去商場廁所。入到去發現一個人都冇，心諗：Good！唔怕亞囡慢吞吞阻住其他人。亞囡去完wee wee，亞媽就順便辦埋大事。

正當我 poo 𡁵之際，亞囡就將我當日同佢戒片講嘅說話，以相當肉緊、仲要高八度嘅語氣講出嚟……

亞囡：嘩！媽媽好叻叻呀！啲poo poo 好犀利呀！又長又大條！你要加油努力呀！

上一秒嘅我心諗：嘩！亞囡你都學得幾淋漓盡致嗰喎！下一秒打開廁所門先發現，原來成個廁所都係人，佢哋一見到我出嚟，都投以竊笑嘅目光，當下，我真係勁想搵個窿捐！

雖然係有啲尷尬，但回過頭來諗諗，如果當日佢戒片嘅時候，我以怪責嘅口吻同佢對話，相信呢一刻，我一定會無地自容。