成日聽人講話Trouble 2同 Terrible 3，我聽得多都有少少驚。仔仔會唔會都成日喊？會唔會唔聽人講？會唔會叫極唔停？
直到我小朋友真的快兩歲，我發現原來Trouble 2都可以係Adorable 2！
你總無法預計Trouble何時出現
話說有一日，當我正悠閒地食早餐嘅時候，突然聽到「沙——」一聲。轉頭一望，我呆咗，差唔多兩歲嘅仔仔，將一罐動物圖案嘅意粉倒晒落地下…
當時嘅我真係唔識反應，腦入面只係諗到：「唉呀，點解你要咁做呀？」、「而家點算好呀，掃死人咩…」、「啲意粉咁細粒，彈到周圍都係，掃少幾粒會唔會惹蟲架？」
「哈哈，Yeah！」仔仔嘅笑聲叫返我去現實，心諗：笑？你仲笑！？而家搞到一鑊泡喇！佢雙手仲好似打麻雀咁掃緊啲意粉。
孩子的快樂很簡單
唔知係咪因為母愛氾濫，我望住佢愈玩愈開心，竟然唔想打破呢個場面。
然後我又諗起，其實佢都唔係第一次咁玩。
仔仔一向都好鍾意玩Messy Play，而我之前用一個奶粉罐存放用來玩Messy Play嘅意粉。平時佢會用唔同嘅工具，例如唔同大細嘅匙羮，將意粉放入唔同器皿。
我突然想通，未夠2歲嘅仔仔應該係唔知原來要喺 Messy Mat 上面玩，但又想玩喎，於是就發生咗呢件事。
把握機會，任何時候都是教養契機
見到工人姐姐拎個掃把出嚟，準備清理現場，我又靈機一觸。
「仔仔，不如今日媽媽教你用掃把，你睇下我！」其實平時姐姐掃地時，仔都有嘗試用掃把，但係大件嘅垃圾唔多，掃塵佢又睇唔到。點估到，今次掃意粉，竟然好成功！
我捉住佢兩隻未係好靈活嘅手仔，將一堆又一堆嘅意粉掃入垃圾剷，自己都有種治癒嘅感覺！就好似秋天落葉，街上滿地都係樹葉時，清潔工人將樹葉掃光，還原一條乾淨嘅街道一樣。連我的煩惱都掃走晒了！
自此，佢見到姐姐掃地，佢又會試下掃。我哋甚至買咗一把屬於佢嘅小掃把，畀啲任務佢，等佢參與家頭細務，學習自理。最近，佢已經學識見到有垃圾，自己拎掃把掃乾淨，倒入垃圾桶。
Trouble 2其實好Adorable？
事後，我反思，曾經令我好恐懼嘅Trouble 2到底係咩意思？
從我觀察仔仔而言，佢真係長大不少。由講詞語，變成開始可以講句子；由漫無目的咁玩玩具，變成有目標咁去選擇佢喜歡嘅玩具車；由要大人陪，變成指定要邊個大人陪，甚至要指定你坐某個位置。
仔仔開始有自主意識，好似好Trouble，但同時亦係佢哋成長嘅印證。
小朋友「闖禍」個陣，我哋難免第一時間都會有種「好麻煩…」嘅諗法，但原來只要停一停，諗一諗，嘗試從佢哋嘅角度出發，了解佢哋嘅成長需要，努力地同佢哋溝通，就會發現 Trouble 背後，都有Adorable 嘅一面。