「媽咪，今日我好開心呀！Millie係我最好嘅朋友！」妮妮跳跳紥的由課室跑出來：「佢食飯時幫我拎水杯同餐具，佢好照顧我呀。」
「吓？點解你唔自己攞呀？」我第一個反應是質問妮妮。
「因為我掛緊件褸呀嘛，咁Millie去拎水杯先咪幫我拎埋囉。」她理直氣壯的道。
係喎！其實朋友間互相幫忙是好事呀！仲要今次Millie係「真朋友」，唔係想像出嚟嗰兩隻腳仔，那為什麼我會有負面反應？
想當年，老娘我還是學生的時候，真係好少主動幫人。唔係我無同理心，而係阿爸阿媽老師個個都話：「自己的事自己做」，有如魔咒。
自己的事自己做，不是嗎？
上體育課時，「大家出嚟每人拎一個呼拉圈」，我唔敢幫人拎，因為我覺得那是不可犯的規。
上英文課時，隔籬同學跟唔上，我唔敢教佢，因為阿爸阿媽老師話上堂唔可以傾計。
小息時，同學建議玩捉，我唔敢跑，所以我狠狠的拒絕佢。
一直以來，我都被教導要做好自己的事，要跟規矩，要聽話。
所以，唔啱規矩嘅嘢，我係唔會做嘅！
不過咁唔係因為我真心擁抱這些規矩，而係我要將受罰嘅風險降到最低。
但我望住個女，佢因為同學嘅一個小幫忙，開心了好久，更給了這個同學「最好朋友」的認證。一個看似唔跟規矩做嘅行為，不但沒有任何負面影響，反而令這個世界更美好。
規矩其實是為何而來呢？我從前很少思考
校裙要及膝、著住校服不可以在街上食嘢、排隊要由矮至高、在籃球場不可踢足球、上堂時要老師批准才可去廁所……相信各位家長對呢啲規矩都唔陌生，我哋細個時明明好大機會曾經懷疑（甚至質疑）呢啲規矩的存在意義，但唔知點解，大個咗就成為咗呢啲規矩嘅擁護者。
之前曾經於網上見過一個「公審」post，指一個媽媽容許自己的女兒於車廂內吃麵包。當時引起兩派不同意見的人激烈討論（俗稱「大辯論」），一方面指車廂不准飲食，是規矩，「總之唔跟規矩你就係唔啱！」；另一方面就覺得，媽媽解釋了，她知道車廂是不可以飲食，但女兒真的是太餓，所以先叫佢快快脆咬個包。
問心而論，那對母女所做的事，對其他人有什麼影響？其實影響近乎其微。那為何不少人都有這麼大的反應？就因為佢哋唔跟規矩。
其實，如果滑梯係可以向上爬，而你看見滑梯有人正準備瀡落嚟，相信你都會等對方先下來，才向上爬。
其實，如果巴士沒有禁止飲食，OT完的你好肚餓，相信你會選擇在車上簡單食個包，而不是開個榴槤大快朵頤。
其實，如果上堂可以講嘢，我諗，當時我會慢慢教我的同學……（因為望住佢無助個樣真係好責心）。
過多的規矩，是否才更磨蝕人性，尤其是同理心？
睇返阿女學校，看似無乜規矩，但實際有另一樣嘢去主導校內的秩序。
「媽咪，今日放學排隊，Carol本身要排最尾，但佢唔想，所以我讓咗我個位俾佢。」
嗯，其實跟高矮排隊，又有什麼意義呢？
🖼️：Pexels