最近，一套有關願望的電影令阿女大感興趣，不停走去問人有什麼願望。一日，在升降機中，阿女的目標是我。
「媽媽，如果你有三個願望，你想要咩呀？」
年紀大面皮薄，唔敢係升降機中大談願望，乘機反問阿女順便窺探兒女事：「咁阿女你又有咩願望呀？」
阿女認真地諗一諗：「第一個…⋯我想要好多玩具。」
我心諗：「估到你啦，衰女！」
阿女又再諗一諗：「第二個，我想要好多零食！」
我又心諗：「無嚟新意。」
阿女再諗：「第三個，我想要好多個媽媽。Yeah！」
我實在嚇一跳：「喂，小朋友，呢個似係你爸爸個願望多啲喎⋯⋯好多個媽媽咁貪心，仲要yeah添！」
隱約看到隔離個男人忍笑忍到低頭扮㩒電話，隊友此時都忍唔住大笑：「喂，阿女，點解你想有好多個媽媽呀？」
阿女根本無理我地兩公婆笑到不行，繼續一本正經咁解說：「全部都係呢個媽媽呀（不停手指指，指住我）！唔係其他媽媽呀！有好多個媽媽，一個可以陪我畫畫，一個可以陪我食飯，一個可以陪我玩……總之就要好多個你啦。」
講到呢度，作為娘親，心中當然甜絲絲：「哦，即係你想媽媽成日都陪住你係咪？」
阿女點頭，笑咪咪攬實我。
「唯獨你是不可取替」——呢句嘢，相信大家最近都會對佢有所動搖，任何關係，也要講緣份，講到底都是一些虛無飄渺之事。唯獨是親子之情，血濃於水，骨肉相連，怎樣割也割不斷。
不過，她沒有像情人般煞有介事對我說甜言蜜語，反倒是在大談願望時無意透露出來，更真更可貴。
女，其實呢，阿媽我心底都有個願望，就是識得分身術，那就可以時時跟在你身邊，輕輕鬆鬆咁應付你呢個小豆丁。
相信，呢個願望係所有為人娘親中的wish list必備的吧，對不對？
圖片來源：pixabay