每個凌晨時分的急症室裡，總會見到一個兩個蓬頭垢面、睡眼惺忪的父母，和一個又一個因發燒而不斷哭鬧的小朋友……從前光是聽醫生朋友的描述，都能體會到父母面對自己孩兒高燒時的無助與惶恐。但針唔拮到肉，真係唔知痛。
早前一個假日晚上，與女兒出外參加派對後回家，一向很少哭鬧的女兒突然因小事而與我對峙繼而開始扭計，心中已覺古怪。
將手放在她額角一剎，便已知分曉，她像是燒起來了，隨即用探熱針確定體溫，乍一看，「攝氏39.3度」，立即被溫度嚇了一跳！
立即再摸下手仔腳仔，凍冰冰的，內心沉了一下，即是目前還是發冷期，體溫有可能會繼續上升……
儘管自己曾是醫護界人員，儘管告訴自己要保持冷靜，因為發燒只是一個病徵，找出源頭所在才是當務之急。但當探熱針的數字飈升到40度時，我仍然會手足無措，只能面容扭曲地一邊替她退燒，一邊想到無邊際的可能性……愈諗愈驚，愈驚愈諗……
為人父母後，任憑你知識如何豐富，當孩子生病時，都很難優雅兼冷靜。
拿起手機打給從前跟隨的醫生老細，劈頭第一句便問：「XX醫院仲收唔收症呀？」
醫生醒目：「點呀，咁肉緊，阿女發燒呀？幾度呀？個人精唔精神呀？餵咗藥未呀？剛剛餵左？哦，半粒鐘後再睇體溫啦。」
半個小時，燒退了一點。也定了定神。回電舊老細報告情況。
醫生笑說：「喂，學過嘅嘢比返晒老師呀？咁驚青……」
我：「喂，流感高峰期呀。」
老細：「發燒只係病徵，要搵源頭嘛……聽日帶阿女見下我啦！」
隔天，到醫務所見舊老細，診斷不是流感，只是一般的傷風感冒。
老細打趣：「即刻答我，傷風感冒有無藥醫？」
我：「無，只能靠藥物減輕症狀，多喝水多休息是王道。」
老細：「搵到源頭，發燒仲駛唔駛咁驚？」
我：「識退無咁驚，持續燒勁驚，高燒超驚，低燒仲驚！做人阿媽，正確來說，係乜都會驚！無咩事我出返去服侍個女先啦～」
老細大笑道：「你立即停止向任何人講你跟過我，丟架！」
發燒，的確只是病徵，在醫學上，這一點都沒有錯。不過，當自己的兒女發燒時，就不只是一個醫學問題了。為人父母後，任憑你在專業範疇上如何運籌帷幄，當孩子生病時，都很難優雅兼冷靜。是不是？
圖片來源：pixabay