圍爐召集｜結伴同行，教養路上不孤單

——做咗家長工作咁多年，要Keep住份passion其實一啲都唔容易，但每次收到家長的正面回應，就覺得又可以行多幾步。

如果大家有留意，我哋搞咗幾場【圍爐】活動，宣傳時有家長問，即係咩嚟？唔講嘢齋聽得唔得？係咪即係「講座」呀？

其實，我哋仲喺度思考緊，「佢」可以係乜。
呢個「佢」，即係POPA可以帶畀家長嘅嘢。

POPA仲有咩可以帶畀家長？

曾經有段時間，我哋公司仝人都好投入做動畫，真係老闆出錢員工出力，回報係好多Followers嘅喜愛加上POPA呢個品牌嘅公信力。動畫的確曾經帶畀家長們好多「叮」一聲嘅moments，更可能係大家認識Positive Parenting嘅起點。

與此同時，我哋知道要實踐片入面講嘅理論一啲都唔容易。於是，我哋問自己，亦都去問家長，POPA仲有咩可以帶畀家長？

過去一年我哋搞過家長班、講座，感謝大家厚愛，反應很不錯。我們也趁機會相約過讀者和學員們，飲杯咖啡傾下偈，聆聽大家的煩惱，分享我們的看法。

圍爐同行，一起成長

也是在這個背景下，催生出【圍爐】——其實「佢」叫乜都唔太重要，因為我哋只係想有個空間，同大家一齊傾下教養煩惱，我哋有機會分享咁多年嚟儲落嘅教養知識和觀點，部分家長願意分享嘅，可以做同路人中嘅前行者，部分家長只想聽下意見，亦可以做個聆聽者。

呢個空間好自在，唔應該有壓力，得到幫助嘅家長將來又可以分享返自己嘅經驗，幫助後來者——我諗，我哋係想可以建立到一個互相支援，同行分享嘅家長社群。

好多謝之前嚟過圍爐嘅家長們，你哋嘅投入令POPA又有繼續前行嘅力量。嚟緊半年，每月都會有一場【圍爐】，講下唔同嘅主題 ，由開學適應、興趣班、親子溝通，到青少年心理需要等都有。

有興趣的家長們，可以到這裡查看主題！