#116 桄媽媽 （兒子，6歲）
「有段經歷我一直都想記低，但未遇到合適機會去講。早排睇到POPA一條講爸爸育兒嘅短片，即諗返起嗰段日子……
話說我婚後好渴望生仔，但我當時諗得好簡單——咪就係大肚生仔囉，而且我對自己好有信心，堅信以我嘅社工同青年輔導背景，教佢湊佢都唔會有問題 （我依家知我當時係太天真啦～）。
響陀仔頭幾個月就出現第一個考驗，就係流啡*。我知依個情況係要留意，不過聽講好普遍、好多人都試過，所以唔係太在意。仍然未真正準備好做人阿媽嘅我，當時第一樣擔心嘅竟然唔係自己同BB嘅身體，而係醫生唔．准．我．返．工。我問『可唔可以返埋今日工先？等我可以返去見埋個個案、做埋啲報告、交帶吓工作……』但係謹慎嘅醫生一聽見就鬧我，仲警告我情況可大可小，要我立即瞓床。
做媽媽的體驗由大肚已開始；可對爸爸來說，BB最初卻是個陌生的存在，他身心需要更多時間，來準備好做別人的父親。
我即時因為安排被打亂而流淚了。由嗰陣開始我先明白，原來我嘅生活唔再由我自己話事。原來由我想生仔嗰刻開始，我就注定有啲嘢要放低。
由會衝紅燈，到非要等到出綠燈都唔過；到做每個決定都要個仔為先；到我感覺到個仔響肚入面嘅每次轉身、打嗝。原來，做媽媽嘅體驗，由大肚已經開始。
直至BB出世，我抱住嗰吓只係覺得一舊暖暖地、有重量嘅嘢，未感覺到其他媽媽講嗰種十月懷胎嘅感動，亦未明白佢將會係我最愛嘅人。雖然陌生，但日日餵奶換片，好快都適應到，慢慢亦真切感受到真正做媽媽嘅日子來臨了。
而爸爸呢？響嗰段日子我只覺得我忙到暈，但佢就唔幫手，唔上心。記得嗰陣熱播緊劇集《天與地》，我忍唔住對佢發脾氣：『點解你日日有得睇？我又冇得睇？』
依家諗返其實佢好慘。個仔一出世，老婆阿媽都爭住餵奶換片；佢好想幫手，但怕越幫越忙，好似大力少少都會整親佢咁，無從入手。不過唔幫呢，又畀人話唔理。對住呢個陌生但有關係嘅第三者，同佢一啲都唔熟。
原來，我同佢嘅起步點根本唔同，同BB相處日子經驗都唔同，根本無得比較。諗通之後，我覺得我當時可以做得好啲，例如係唔好咁緊張，有咩衝去BB度即時處理咗先，畀多啲（再再再多啲）機會同信心佢練習湊仔，等佢有更多親身嘅育兒體驗。
至於依家，幫唔幫手嘅問題唔再存在，而係佢錫個仔多過錫我，我會呷醋囉～」
圖片來源：Unsplash
*流啡：是「作小產」迹象。懷孕初期，胚胎著床於子宮，若著床不好，有機會出現滲血情況，呈啡色，俗稱流啡。