#83 朝瞳媽 （女，兩歲大）
「香港社會愈來愈複雜，小朋友起跑線已經推到無可再前，真係覺得有啲悲哀，『點解個社會會搞成咁……』但人總要勇敢生存，所以我將『希望』投射喺朝瞳身上，成日同自己講要佢活得更有意義，所指嘅並非每日奔走於大大小小嘅興趣班，而係建立人與人之間的關係，多啲關心身邊嘅人。
喺物資過盛嘅時代，我唔擔心小朋缺乏知識（直覺話我知佢十歲就會識用電話Google search），但會擔心佢缺乏同理心、唔識為人設想，所以我一直提自己要教導女兒要有善心。喺阿女朝瞳一歲半左右，我開始上網搜尋，睇下小朋友有咩義工活動可以參與，於是發現咗『BB醫生』呢個活動。主辦機構會定期提供長者院舍探訪活動畀6個月至6歲嘅小朋友參加，小朋友唔需要做啲咩好特別嘅事，去到只需要同長者自我介紹下、唱下歌、摸下手仔，開開心心咁就一日；小朋友亦會獲派發貼紙同手帶，用嚟同長者互動。
學校和興趣班能教授知識，但談到培養孩子的善心，父母的角色至關重要。
朝瞳成為『BB醫生』資歷尚淺，半年以來大概出席咗4至5次。從第一次到最近的探訪，朝瞳表現成熟咗好多，由最初的只聽媽媽吩咐，到而家主動行近老友記，有身體接觸，仲識跟住一班哥哥姐姐落力大合唱，唔再需要我跟尾。記得有一次，我地帶咗朝瞳鍾意嘅醫生玩具去，佢就幫婆婆聽心跳，仲四圍幫人打針，而老友記都交足戲，笑住大叫『好痛好痛！』洋溢一片歡樂氣氛。
過程之中見到長者嘅笑容、朝瞳嘅進步，就係鼓勵我不辭勞苦帶朝瞳參加嘅動力！另外，就如主辦機構創辦人訪問所講，希望藉活動對上一代或祖父母添加多一份關愛。而我亦確實喺朝瞳身上亦都見到一點一點的改變，本來有點怕老人家嘅佢，依家無咁抗拒同太爺太嫲接觸，錫錫都主動咗，平時喺街上面亦好樂意同老人家打招呼，氹得佢哋好開心。
其他人或者會問：『小朋友咁細，點解要帶佢去做義工？』我嘅答案好簡單，因為善良的心唔係返學校同Playgroup就可以培養得到，每日返學都會有老師教佢知識；但係品德呢，如果爸爸媽媽唔教，佢就可能會唔識。就以探訪院舍為例，如果我唔帶佢去，佢可能唔會知社會上仲有長者同其他人，亦都唔知自己有好多嘢可以幫到忙。所以我相信，做父母嘅做好身教，慢慢感染佢，咁就可以教識佢大個亦存好心、做好事。
其實，就算無時間參與義工活動，都有好多好事可以做呢！搭電梯時可以主動同伯伯say Hello，再大個啲又可以幫婆婆拎重嘢，已經會為對方帶來關心同快樂，何樂而不為呢？」
圖片由受訪者提供