不知道大家懂不懂相機的原理，相機光圈越大，對焦就越準確，但其餘的都會變得十分模糊。我說，父母都是一部光圈極大的相機，對焦就只這麼一點，目標就這麼明確——孩子——其他的一切都變得不再重要。但，一個家庭，只有父子母女的關係被重視，而夫妻關係被忽略的話，真的能長久維持嗎﹖
愛小孩多於另一半
英國一個調查發現，四份之三的母親同意自己愛小孩多於丈夫。這並不是學術研究，亦不是針對香港家庭的一個調查，但試想一下，小孩出生後，你對焦的那一點，有多少時間還停留在你的另一半那裡﹖唔好話拍拖，就連「互數心中情」嘅嗌交時間都無埋！
仔女，有毛有翼就會飛，只有老伴，能手牽手一直走到生命盡頭。
經歷時間的洗禮，讓感情能細水長流，一定是每一對戀人結婚時的願望。但，維繫一段感情，對抗時間的衝擊，不是口裡說說就做得到。以前我們父母的年代，總是說有小朋友的夫妻，感情較易維繫。可是小孩的降臨，其實對夫妻倆人的生活有著極大的影響，小孩好似一個reset button咁，一出世，兩夫婦就要忘記以前曾經轟烈過的愛情生活，將生活從頭reset過。
以前攬住一齊瞓，依家就要前後腳瞓！以前係屋企睇電視電影都環迴立體聲，依家就校到無晒聲睇字幕，最緊要唔好嘈醒小朋友！以前去公園散步談談情，說說愛，依家就例牌先搵個滑梯再搵張可以𥄫實佢嘅凳，可以坐到幾分鐘都係一個bonus！以前以前……有咗小朋友，仲邊又以前吖﹖！究竟我哋仲有冇愛情﹖——可能係你夜深人靜時，望住已瞓到成隻豬嘅另一半嘅時候問自己嘅問題！
有小孩會影響婚姻美滿度？
美國愛荷華大學教授Erika Lawrence曾經追蹤有小孩同無小孩嘅夫妻，並對佢地嘅婚姻美滿度作出比較，發現夫妻間嘅感情無論有冇小孩，一般來說，美滿度都係會下滑。(可悲卻是現實！) 但係有小朋友嘅夫妻，婚姻美滿度下滑的速度差不多快兩倍！大家亦唔好以為生BB前婚姻好美滿就會免疫﹖！原來，越美滿就跌得越甘！本來十分恩愛，有咗小朋友之後，一下子生活就要作出180度的調節，這種落差，反而對婚姻美滿度有更大的衝擊！
唔通，小朋友係婚姻殺手﹖咁又唔係喎，英國非牟利機構Marriage Foundation同University of Lincoln嘅一個研究就指出，感到不快樂嘅父母失落唔會持續太耐，可以話雨過後就天晴！不過，如果無好好正視依個過渡，問題就會越滾越大。所以有小孩嘅我地就更加要把努力為婚姻保鮮！正所謂「吊頸都要透吓氣」，筆者曾經把每個月的第一個星期五定為與太太的「拍拖紀念日」(工人姐姐還在時)，期望放下父母的身份，回味一吓年輕時拍拖的二人世界。
仔女，有毛有翼就會飛，只有老伴，能手牽手一直走到生命盡頭。愛太太或是囡囡多一些﹖確是一個十分無聊的問題﹔兩種不一樣的愛又怎麼能夠比較﹖但這問題卻提醒了我們，在好好照顧那可愛小B的同時，也不要忘記了用心好好的去愛自己的另一半。