奶奶——網上人稱「99」，係電視台俾人叫「野蠻奶奶」，係一個網上王國更是成日都被置頂嘅話題。呢個話題好多時都係圍繞住某人嘅奶奶，係唔適當既時候講唔適當嘅野，例如係大家教仔時，佢會毫無預警地分享「十分寶貴」嘅意見。
太太們都會盡力去忍，但係當佢地希望用眼神向老公求救時，老公竟然一再迴避，將塊面擰到只可以見到佢個後尾枕……依啖氣真係啃唔落！「你有冇搞錯呀！嗰個係你阿媽黎架，你唔出聲唔通我出聲呀﹖」就係咁，就唔可以再迴避啦……
自己嘅父母，一定要自己去manage！
原本，湊小朋友有父母幫手，是一件開心事。但，祖父母與父母的教育理念大多都不一致。說來諷刺，但好多時就係因為「愛」，但愛的方式不同，家庭才會出現磨擦。
婆媳關係難破鏡重圓
其實筆者都真係試過為咗自己既教育理念，同自己父母，或人地父母，拗交。係依個過程中，我深深體會到，自己嘅父母，一定要自己去manage！心理學專家都係咁講，如果在教育子女的問題上同祖父母有分歧，最好唔好要另一半出聲。所以係遇到同上述雷同的情況下，真係唔好怕麻煩唔出聲。因為如果另一半抵唔住頸，咁事情可以一發不可收拾。畢竟父母子女之間唔會有隔夜仇，幾天後又可以言歸於好，但婆媳關係一破，卻難以破鏡重圓。所以，當爺爺嫲嫲話「你老豆阿媽都唔知點教仔」個時，丈夫就要出頭同佢地傾傾；當公公婆婆講「教仔之嘛唔使咁嚴喎」個時，太太就要挺身而出！
如果真係唔想manage或handle以上嘅情況，心理學專家就建議，父母及早跟祖父母溝通自己的教育理念，讓祖父母在冷靜時細聽理念背後的原因，再跟他們商討不可超越的界線；例如，早早就同自己父母講好，當自己在教小孩的時候，請他們不要插嘴，這樣磨擦就會有所減少！
有研究發現，喺世界上大約有1億6千3百萬個小孩都是由祖父母湊大。其實祖父母輩嘅貢獻都好大。At the end of the day，父母想子女好，祖父母亦都想孫兒好。大家都係出於正面，但又因此而拗交，這不是很不值得嗎﹖家庭和諧，其實對小朋友成長都有好大的正面影響架！