「你係咪又唔記得咗我叫你做咩？」——呢句說話熟口熟面，特別係爸爸們可能成日聽到。
早幾日編輯哈彼里爸爸都一樣，話說佢太太欽點咗佢去圖書館幫阿仔借書，點知老婆大人返到屋企之後唔見有書，諗住老公肯定又係左耳入右耳出，劈頭第一句就話佢！
估唔到平時間中會甩轆嘅哈彼里爸爸，今次好叻豬：「我一早用咗香港公共圖書館嘅Hyread 3應用程式借咗電子書啦！」佢打開咗個app，然後遞咗部手機畀老婆睇。
老婆半信半疑，再望下個電子書櫃，唔望由自可，一望把幾火！事關老公借嘅係《耶魯最受歡迎的金融通識課》、《原子習慣》、《5W1H超強思考術》……「喂，究竟你幫個仔借書定幫自己借呀？」
▋鬆一鬆e閲讀小站
哈彼里爸爸嗰日唔知點解轉數極快，即時秒回老婆：「唔啱睇咪上個app再借過囉，反正無限額。」
老婆狐疑：「點解會無限額任借咁好？」
哈彼里爸爸：「嗱，你望下，公共圖書館推出咗『鬆一鬆 e閱讀小站』，由即日起至6月21日，每月精選30本中文電子書同有聲書，只要登入圖書館帳戶，就可以無需預約，免費借書，而且精選電子書仲唔會計入每人借閱限額內。而家係新時代，叫咗你平時學下睇電子書……」
話音未落，哈彼里爸爸眼尾望到老婆面色一變，唔想花式自殺嘅佢，就唯有即時補飛認衰啦。「老婆呀老婆，我都幫你借咗幾本書，有《初嘗麵包香》同埋《解決居家的100個煩惱》，你一定會鍾意嘅！我哋仲可以一齊睇𠻹呀，我都唔想睇來睇去都係嗰類書，係時候走出閱讀「舒適圈」～☺」
哈彼里爸爸仲即時叫埋阿仔過嚟，一齊再揀過啲書。毫無懸念，阿仔梗係揀返啲繪本同童書啦，例如《魔法森林大事件》、《西遊記》、《你是媽媽眼中獨一無二的孩子》，仲有有聲書《消防車!喔咿喔吚~》，唔通真係會睇金融書咩……
其實大部分太太對住老公發嬲嘅原因，通常都係同個仔有關。只要老公幫手搞掂阿仔啲嘢，老婆條氣都順咗九成啦。
▋走讀香港歷史建築系列
於是哈彼里爸爸好醒目咁再介紹多個活動畀老婆知：「老婆，我知今次圖書館仲有好多活動㗎！例如呢個『走讀香港歷史建築系列』咁，唔一定要外遊，呢個線上遊活化古蹟都好正。」
見到老婆豎起耳仔好有興趣咁，於是哈彼里爸爸一於繼續講落去：「主持會帶領大小朋友穿梭時空隧道，透過短片和導賞，介紹香港歷史建築物，仲有故事大使分享相關主題故事。第一集係香港青年協會領袖學院，即係前粉嶺裁判法院，跟住仲有虎豹樂圃、屏山文物徑同香港天文台呀！嘩，幾正！阿仔平時最鍾意就係啲晴雨表。」
「第一集喺4月23日播出咗啦，詳情同埋其他精彩活動可以喺『喜閱•飛越』網頁睇到呀。」哈彼里爸爸講完之後，仲順手message埋活動詳情條link畀老婆。嗰刻，佢覺得自己無懈可擊。
老婆面露歡顏應咗句：「算你啦。」然後擰轉面陰陰嘴笑，心諗：「衰佬，平時機不離手，估唔到畀你叻返次。」