「你諗好暑假個Plan未？」見到老婆傳來呢個訊息，編輯哈彼里爸爸背脊即時涼咗一大截！
老婆一早吩咐落，要諗暑假安排咩活動畀個仔，不過日日忙住返工嘅佢，竟然將呢件事忘記得一乾二淨！
不過，經驗老到嘅佢回咗一句：「梗係Plan咗，仲預備咗個福袋驚喜畀你添呀，返到屋企話你知。」車程得短短20分鐘，到底點樣度一個100分嘅「夏日親子提案」出嚟好呢？？
▋過百場線上線下活動
哈彼里爸爸一入門口就先發制人：「你知唔知公共圖書館推出咗一系列線上線下暑假活動？」
太太都未來得及反應，哈彼里爸爸繼續介紹。一年一度大型閱讀活動「夏日閱繽紛」有超過100場故事劇場同親子工作坊，遍布十八區，仲有線上影片同實時工作坊。「可以玩足成個月，洗乜擔心搵唔到活動？今年仲增設咗成人工作坊，連我哋都可以玩埋一份。」
▋小書袋：精選主題書籍一袋借走
「老婆，你平時咪好鍾意買福袋嘅？」太太立即雙眼發光。「如果有個免費嘅福袋係咪仲吸引？」
哈彼里爸爸講緊嘅係「小書袋的閱讀新世界」，呢個小書袋就好似福袋咁充滿驚喜，入面有兩本預先揀好嘅精選主題書籍，涵蓋六大主題包括：「成長」、「創意幽默」、「百變主題1+1 」、「獲獎優質書籍 」、「郁一郁運動」和「分館自訂主題」，每個主題分為兩個年齡組別：3至5歲及6至8歲，小朋友可根據自己年齡、主題喜好自選書袋，開展閱讀探索之旅。
「老婆，你成日話唔知揀咩書畀阿仔好，而家就可同佢討論借邊個主題，了解多啲佢想法，畀佢自己話事，最緊要令佢愛上睇書。講開又講，其實你又唔洗成日幫佢做決定嘅～」
哈彼里爸爸嘅弦外之音，太太梗係聽得明，立即回佢一個黑面。
哈彼里爸爸轉數一向快，佢繼續掌握住個話語權，唔畀太太有機會話佢：「小書袋有現成搭配，仲有兩度好。最緊要就係方便到老婆你一袋過借走，『快靚正』，唔洗咁辛苦嘛。同埋平時大人細路偏向某類型嘅書，而家就可以跳出閱讀舒適圈，齊齊探索多元化嘅館藏，擴闊閱讀視野。聽講特選圖書館仲有特別擺設，等小朋友可以有個獨特嘅閱讀體驗，我哋不如帶埋阿仔去囉！」
活動將於7月30日在藍田公共圖書館開始，然後分階段於元朗公共圖書館和柴灣公共圖書館推出。
▋互動故事房：來一場親子冒險
講到探索未知，哈彼里爸爸順手介紹埋「互動故事房」畀太太聽。呢個係一個實時網上互動故事劇場，參加嘅小朋友可以透過Zoom投票決定故事發展。今次故事《媽媽怪怪的》邀請小朋友化身為小偵探，透過互動遊戲幫助主角解開媽媽怪怪嘅謎底！活動會喺8月20日舉行，同步有YouTube實時直播，大小朋友可以睇住劇情推進，一樣咁有趣。
聽到呢度，太太終於忍唔住插嘴：「等我估下先。你跟住係咪諗住講埋實時網上工作坊同埋『禪繞畫創作 x 陶笛欣賞』工作坊？」
哈彼里爸爸：「係呀，你點知㗎？」
「我梗係知啦，我都有上網㗎嘛！圖書館呢一連串活動我一早bookmark咗啦，我同阿仔不嬲都係fans嚟，睇嚟你都幾清楚我哋口味～」
就係咁樣，編輯哈彼里爸爸再次化險為夷！
如果你都想好似哈彼里太太咁mark定日子，快啲瀏覽「喜閱．飛越」網頁，了解詳情～