POPAsharing
299 views

當Girls’ Talk變了Mamas’ Talk

Jun 13, 2017

前陣子讀到一篇文章說,作者慨嘆隨著年紀漸長,令姊妹聚會多少有點變質。昔日大家明明無所不談,但自從某些姊妹當了媽,話題就總是離不開小朋友。有人留言紛紛表示贊同,亦有「媽媽幫」表示身不由己,並大嘆一句「你哋唔明㗎啦…」


我想講:我明,我真係明,因為我都係人哋阿媽。記得初為人母嗰段日子,每當朋友間聊起什麼旅行大計、行街扮靚、暢銷書籍,感覺都好似唔關自己事。跟身邊人嘅話題亦好順理成章地三句唔埋,兩句就講起個女。


諗深一層,一切其實係個警號。 
佢話緊我知,我嘅生活重心正一面倒咁傾向咗小朋友身上。
佢話緊我知,係時候去搵返屬於自己嘅步伐。


其實難得跟朋友見面,何不暫時拋開「媽媽」呢個身份?
唔需要刻意迴避有關孩子嘅話題,但可以嘅話,也聊聊其他吧。
咁做並非要迎合他人,只係媽媽嘅生活唔應該只有孩子呀!


曾經跟一位同樣為媽媽級嘅朋友傾過,佢認為重點係平衡,仲話做咗媽媽先更要自我增值,接觸多啲唔同嘅嘢,咁先可以將呢啲「養分」傳授俾小朋友,間接擴闊佢哋嘅世界。


有人話,當一個稱職嘅媽媽唔容易。
我就覺得,當一個稱職而又不失自己嘅媽媽先係難上加難。


作者:Hey!mama,全職媽媽,前廣告公司文案,現任女兒阿希24小時貼身專員。熱愛文字,相信繪本是通往孩子內心的一道橋樑,正努力成為女兒的繪本治療師。

yes