POPArticles
207 views

我的野蠻99

Apr 11, 2017

奶奶——網上人稱「99」,係電視台俾人叫「野蠻奶奶」,喺一個網上王國更是成日都被置頂嘅話題。呢個話題好多時都係圍繞住某人嘅奶奶,喺唔適當既時候講唔適當嘅野,例如係大家教仔時,佢會毫無預警地分享「十分寶貴」嘅意見。

太太們都會盡力去忍,但係當佢地希望用眼神向老公求救時,老公竟然一再迴避,將塊面擰到只可以見到佢個後尾枕……依啖氣真係啃唔落!「你有冇搞錯呀!嗰個係你阿媽黎架,你唔出聲唔通我出聲呀﹖」就係咁,就唔可以再迴避啦……

原本,湊小朋友有父母幫手,是一件開心事。但,祖父母與父母的教育理念大多都不一致。說來諷刺,但好多時就係因為「愛」,但愛的方式不同,家庭才會出現磨擦。

其實筆者都真係試過為咗自己既教育理念,同自己父母,或人地父母,拗交。係依個過程中,我深深體會到,自己嘅父母,一定要自己去manage!有心理治療師都係咁講,如果在教育子女的問題上同祖父母有分歧,最好唔好要另一半出聲。所以係遇到同上述雷同的情況下,真係唔好怕麻煩唔出聲。因為如果另一半抵唔住頸,咁事情可以一發不可收拾。畢竟父母子女之間唔會有隔夜仇,幾天後又可以言歸於好,但婆媳關係一破,卻難以破鏡重圓。所以,當爺爺嫲嫲話「你老豆阿媽都唔知點教仔」個時,丈夫就要出頭同佢地傾傾;當公公婆婆講「教仔之嘛唔使咁嚴喎」個時,太太就要挺身而出!

如果真係唔想manage或handle以上嘅情況,專家建議父母及早跟祖父母溝通自己的教育理念,讓祖父母在冷靜時細聽理念背後的原因,再跟他們商討不可超越的界線;例如,早早就同自己父母講好,當自己在教小孩的時候,請他們不要插嘴,這樣磨擦就會有所減少!

記得曾經看過有研究發現世界上大約有1億6千3百萬個小孩都是由祖父母湊大,其實祖父母輩嘅貢獻都好大。At the end of the day,父母想子女好,祖父母亦都想孫兒好。大家都係出於正面,但又因此而拗交,這不是很不值得嗎﹖家庭和諧,其實對小朋友成長都有好大的正面影響架!


作者:科豆,科學與老豆的合成體,喜歡與太太及女兒一同成長,遇到教女難題會上網找文獻的一個中年科學爸爸。

文中參考資料:https://goo.gl/28wyuA

yes