POPArticles
79 views

嗌一場「有好處」嘅交

Apr 17, 2018

「老公,唔該你啲衫唔好亂咁放啦!」——當你喺屋企都OT到如火如荼,太太呢聲最後通牒當然係扮聽唔到啦。點知,30秒後一堆衫「從天而降」落咗自己頭上,度極都度唔到條橋嘅筆者,心煩之餘更是無名火起三千丈,即刻「還拖」:「我啲櫃桶一路俾你侵佔,都無地方,仲點放衫!」

 

對太太「還拖」如同宣戰,一發不可收拾!正當大家你一句我一句,黎到嗌交嘅高潮位之際,囡囡一個問題劃破長空:「今次邊個曳曳豬俾人鬧?」

 

「噢!唔記得咗個女喺側邊畫緊畫添,死火,點收科好?都係唔好嗌住。」嗰刻,筆者相信自己跟太太有過這麼一刻的心靈相通⋯⋯於是,倆公婆由「面紅耳赤」到「笑裡藏刀」,用咗破記錄嘅——「兩秒」。

 

當然,場交就無再嗌落去,但同太太繼續面左左,件事又不了了之,筆者個心反而仲更加「囉囉攣」,好似仲有啲事未解決咁。對小朋友黎講,睇見父母突然「friend返」,佢地又係咪會當無事發生過?

 

「Not all conflict is bad -- it's about how you manage it.」——亞利桑那大學的研究員Kopystynska嘅呢句說話,對筆者而言相當深刻。佢嘅一個研究話父母之間嘅衝突處理得唔好,例如只係互相對罵又唔係講返嗌交件事,甚或是嘈交時將咸豐年前發生過嘅「舊事重提」,都會嚴重動搖小朋友對屋企嘅安全感。

 

但如果父母雙方能冷靜和相互尊重,嗌交都集中喺件事度,朝著解決問題的方向邁進,仔女睇到,反而對佢地日後嘅社交能力有幫助,令他們能正面咁面對將來都必然會遇上的「衝突」情況!

 

於是,我先為只顧工作而不回應而向太太賠罪,而太太亦為她「佔領」了我的「地盤」而跟我道歉。筆者和太太更將「唔夠位放衫」呢件事在女兒面前重提,商討後仲一家人一齊執好啲衫,把舊了不會再穿的放到「舊衣回收箱」,騰出衣櫃空位。估不到,一場交都可以變成一個親子活動!

 

其實,與另一半有衝突有時真的難以避免,但如何處理這些衝突,對夫妻關係甚至整個家庭的和諧才是最關鍵的因素!


作者:科豆,科學與老豆的合成體,喜歡與太太及女兒一同成長,遇到教女難題會上網找文獻的一個中年科學爸爸。

 

參考資料:

 University of Arizona. "Parents: How you manage conflict has an impact on your kids." ScienceDaily. ScienceDaily, 20 September 2017.

yes