POPArticles
332 views

女生入男廁

Oct 12, 2017

如果你問一個老豆,湊住一個三歲大嘅女女出街,最大嘅難題係乜﹖

有人會話係個女發脾氣,個女唔肯食野,或著個女扭抱。但依啲通通都唔係筆者嘅答案。

 

案件重演:

 

係一個星期日嘅下午,筆者一家大細去商場,諗住享受片刻寧靜。當時老婆剛懷有身孕,照顧阿女的責任自然落在筆者身上。一切有如平日咁風平浪靜,但女女的一句﹕「我想wee wee」——劃破長空!老實說,個女差不多三歲,一直都係由老婆帶去女廁居多。但老婆大人有咗,帶小朋友去廁所實在係唔方便,筆者當然係會挺身而出啦!

 

 一男一女要一齊去廁所,依個組合只有兩種選擇,一係就係親子型,再唔係就要借用殘廁。但係,係地少人多嘅香港,唔係冇就係排隊到你時,已經唔使用,因為個女通常唔急到賴,都唔會同你講要wee wee。於是,係依個無親子廁所,殘廁又大排長龍嘅商場,我決定去男廁!

 

阿女經過女廁時,問我﹕「點解唔入去嘅﹖」
老豆﹕「老豆係男仔唔入得女仔廁所架!」
去到男廁外,佢又問﹕「我係女仔嚟喎,點解入男廁﹖」
老豆諗咗一陣﹕「老豆係男仔,所以入男仔廁所囉!」

好彩今次fake到佢,順利進入男廁!點知依個男廁個設計係尿兜行先,筆者唯有用自己龐大嘅身軀諗住遮擋佢嘅視線,最終當然係失敗收場。

女﹕「佢地企晒係度做乜呀﹖」
老豆﹕「係囉,佢地係度做乜呢﹖」
女﹕「咁個啲白色一個個係啲乜嚟架﹖」
老豆﹕「係喎,係啲乜嚟架呢﹖」

係一個唔適當嘅時間要解釋一啲咁複雜嘅問題,迴避係筆者情急想到的唯一出路。

 

終於,去到有廁格的區域,竟然全部上晒鎖!乜話﹖點解男廁都要排隊﹖等咗三十秒,女:「我好急呀,要瀨啦!」平時「敵不動,我不動」,但面對真係全無動靜嘅廁格,筆者知道再「不動」就有機會Game Over,於是抱住女女的我,一支箭咁跑去上一層。好彩,殘廁無人……

 

但任務真的順利完成!?原來入男廁令阿女耿耿於懷,那天整天她都說著自己係女仔,應該入女廁。及後,跟她說了對不起,應承不再帶她去男廁,盡可能不等她叫就先跟她去wee wee,才使她心情平靜下來。

 

其實,有研究顯示大約七成小朋友係21個月大已知道性別有所不同,帶他們去不屬於自己性別的洗手間實在不方便,但坊間的親子設施實在供不應求。對於筆者來說,太太的懷孕期就這麼一年,忍耐一下就過去了。但,試想下那些單親家庭,爸爸湊女媽媽帶仔,這個難題也許就更困擾了。要是能多一點親子洗手間,父女與母子這些組合就不需要借用殘廁。

 

這次也讓筆者驚覺,一直以為女兒還小,未有想過如何開始性教育這個大議題,但看來是時候要開始收集前輩意見,再加上research一下文獻去好好裝備自己,下次不再用逃避這個最消極的方法,去回答女兒一些正常不過的問題了!


作者:科豆,科學與老豆的合成體,喜歡與太太及女兒一同成長,遇到教女難題會上網找文獻的一個中年科學爸爸。

 

資料來源:

Soh, D. W. (2017, January 06). The futility of gender-neutral parenting.(https://goo.gl/PZeXsY

Todd, B. K., Barry, J. A., & Thommessen, S. A. (2016, May 24). Preferences for ‘Gender‐typed’ Toys in Boys and Girls Aged 9 to 32 Months. (https://goo.gl/rNAzsa

yes